Waqt konferenza tal-aħbarijiet organizzata mill-Partit Nazzjonalista, is-Segretarju Ġenerali, Michael Piccinino, qal li ma riedx jiddevja u jwieġeb mistoqsijiet dwar l-eks Viċi Kap Nazzjonalista Robert Arrigo.
Meta ġie mistoqsi jekk il-Kap, Bernard Grech, għandux għall-inqas joħroġ b’apoloġija pubblika dwar l-akkużi li għamel l-eks Viċi Kap Nazzjonalista fil-konfront tat-tmexxija tal-istess Partit, Michael Piccinino rrefera għal każ serju ta’ Robert Arrigo bħala “affarijiet oħra” u qal li ma jridx jiddevja u jwieġeb dwar dan is-suġġett.
Huwa qal, “Naħseb li hawn qed nitkellmu fuq l-Indipendenza u l-attivitajiet li qed jorganizza l-Partit u ma naħsibx li għandna niddevjaw fuq affarijiet oħra.”
Huwa sostna li dak li kellu jintqal fuq din il-kwistjoni diġà ntqal.
Sostna, “Dak kollu li kellu jintqal dwar il-kwistjoni relatata diġà ntqal.”
Id-determinazzjoni ta’ Michael Piccinino li ma jweġibx mistoqsijiet dwar Robert Arrigo kompliet toħroġ fil-beraħ fi tmiem il-konferenza.
Hemmhekk, il-ġurnalist ta’ ONE, li baqa’ mingħajr risposta għall-mistoqsija tiegħu, reġa’ staqsa lis-Segretarju Ġenerali tal-Partit Nazzjonalista l-istess domanda.
Kien hawn li Piccinino fil-pront qam minn bilqiegħda u lebbet jiġri l-barra mill-kamra li fiha saret il-konferenza.
Ġurnalist minn ONE News qal, “Michael, ma weġibtlix id-domanda tiegħi. Għandu jagħmel apoloġija l-Kap, Bernard Grech? Għaliex daqshekk problema twieġeb?”
Din mhix l-ewwel darba li l-Partit Nazzjonalista ħarab minn mistoqsijiet dwar l-akkużi li għamel lit-tmexxija tal-Partit l-eks Viċi Kap Nazzjonalista, Robert Arrigo.
Proprju jumejn wara l-akkużi li għamel l-eks Viċi Kap Nazzjonalista, mal-mikrofonu ta’ ONE News, Bernard Grech ħareġ igiddeb lil Arrigo u d-dikjarazzjonijiet tiegħu.
Grech kien qal, “Ma huwa veru xejn, ma huwa veru xejn.”
Id-dikjarazzjonijiet ta’ Robert Arrigo ddominaw mhux ftit l-aħbarijiet u l-gazzetti fil-ġimgħat li għaddew.
Numru ta’ opinjonisti u edituri kitbu dwar is-sitwazzjoni mwiegħra u ta’ firda fil-Partit Nazzjonalista; sitwazzjoni li saħansitra wasslet biex l-eks Viċi Kap Nazzjonalista jgħid li l-weġgħat li sofra fil-Partit huma ikbar minn dawk li qed iħoss kawża tal-kanċer li, sfortunatament qed jgħix bih.
Arrigo kien sostna, “Naħseb il-weġgħat li saru huma ikbar milli qed inħoss issa fil-cancer, personali għax inħobb il-partit. Għadni nħobbu l-partit. Irrid nirranġah u mhux inkissru. Ippruvajt minn ġewwa, ma rnexxilix. Tajt kollox għall-partit jien, inkluż saħħti llum.”
