Meta kien Kap taċ-Ċentru tal-Informazzjoni (MIC), il-Kap tal-Oppożizzjoni pparkja ħażin u qala’ ċitazzjoni. Anke jekk it-tort kien kollu tiegħu, insista mal- Ministeru għall-Affarijiet Barranin biex iħallaslu dawn it-€23 (dak iż-żmien Lm10) u għalkemm din kienet xi ħaġa kontra r-regoli, il-Ministeru għamel eċċezzjoni għalih.
Jikkonferma dan dokument ippubblikat fil-gazzetta KullĦadd. Dan il-każ seħħ żmien li Simon Busuttil kien f’kariga li minnha daħħal kwart ta’ miljun ewro fuq medda ta’ ftit snin.
Il-KullĦadd tirrapporta hekk:
Meta kien Kap taċ-Ċentru tal-Informazzjoni tal-Unjoni Ewropea, Simon Busuttil, kellu każ fejn ma setax isib parkeġġ u għalhekk ipparkja ħażin il-karozza li kien qed jikrilu l-gvern. Dan wassal biex qala’ 
ċitazzjoni mingħand gwardjan lokali li kien qed idur il-Belt. Iżda, dak li llum huwa Kap tal-Oppożizzjoni insista li €23 multa ma jħallashiex.
Dan huwa pruvat minn korrispondenza li għandha l-gazzetta KullĦadd fejn f’Awwissu tas-sena 2000, Alfred Falzon kien qed iwieġeb għall-ilment li għamel Simon Busuttil li kontra dak li jagħmel kull ħaddiem, ilmenta li ma riedx iħallas il-multa.
Alfred J Falzon, Direttur tas-Servizzi Korporattivi, spiċċa jgħid lil Simon Busuttil li se jagħmel eċċezzjoni. “Irrid ninfurmak li b’eċċezzjoni, iċ-ċitazzjoni talli pparkjajt fuq il-bankina ħdejn il-Ministeru tħallset. Filwaqt li nirrikonoxxi li kont magħfus bil- ħin biex tattendi dawn il-laqgħat u li tista’ taħli l-ħin biex issib parkeġġ, ġentilment nitolbok biex tevita li tipparkja f’żoni fejn ma tistax. Il-Ministeru mhux se jassumi responsabbiltà ta’ kontravenzjonijiet ta’ dan it-tip l-ġejjieni,” kiteb lil Simon Busuttil. Simon Busuttil li ta’ spiss jitkellem fuq onestà poltika għawweġ ir-regoli biex jiffranka €23 meta bħala Kap tal-MIC bejn l-1999 u l-2003 tħallas kwart ta’ miljun ewro. Dan ifisser li Busuttil ingħata paga seba’ darbiet ogħla mill-paga minima f’dak iż-żmien.
Il-paga li ngħata sbatax-il sena ilu, -1999 u li baqa’ biha sakemm baqa’ Kap tal-MIC, kienet ta’ €40,800 s-sena. U Busuttil ingħażel mingħajr ebda sejħa pubblika.
Ta’ min jinnota li l-paga tal-Kap taċ-Ċivil u tal-Avukat Ġenerali -1999 kienet ta’ €22,500. Jiġifieri l-paga ta’ Simon Busuttil bħala persuna ta’ fiduċja sbatax-il sena ilu kienet 80% ogħla minn dik tal-Kap taċ-Ċivil dak iż-żmien.
Il-paga tal-Kummisarju tal-Pulizija -1999 kienet ta’ €20,800. Jiġifieri l-paga ta’ Simon Busuttil bħala persuna ta’ fiduċja sbatax- il sena ilu kienet 96% ogħla minn dik tal-Kummissarju tal-Pulizija dak iż-żmien.
Il-paga tal-Kummissarju Elettorali Ewlieni -1999 kienet ta’ €17,600 li jfisser li l-paga ta’ Simon Busuttil bħala persuna ta’ fiduċja kienet 130% ogħla minn dik tal-Kummissarju Elettorali Ewlieni dak iż-żmien.
Ta’ min jgħid li mal-paga Simon Busuttil kellu karozza bil-fjuwil imħallas u mowbajl imħallas ukoll.
