Kemm-il darba nisimgħu kif missirijiet jgħaddu b’suċċess il-mestier tagħhom lil uliedhom.
Dan isir anke sabiex iżommu t-tradizzjoni għaddejja fi ħdan il-familja filwaqt li, b’dedikazzjoni, jibqgħu joffru s-servizzi tagħhom fix-xogħol konċernat.
Hekk se jiġri fl-Għaqda Karmelitana Banda Queen Victoria taż-Żurrieq, hekk kif wara 30 sena ta’ servizz bħala Surmast u Direttur tal-istess banda, is-Surmast Direttur Alfred Farrugia se jkun qed jgħaddi b’mod uffiċjali l-bakketta tiegħu lil ibnu Mauro.
Dan se jsir waqt programm mużikali li se jsir nhar il-Ħamis u li se jimmarka tmiem il-karriera mżewqa tas-Surmast Farrugia.
Iltqajna mas-Surmast Farrugia u ma’ ibnu sabiex neħdulhom minn moħħhom dwar dan il-pass importanti kemm għalihom infushom u anke għall-Għaqda mużikali nfisiha.
Is-Surmast Alfred Farrugia ta’ ħarsa lura lejn il-karriera tiegħu.
“Dawn it-tletin sena – ħeqq, mhux sena qed titkellem – kellek ħafna żviluppi ġodda interessanti. Kellna mumenti ta’ dwejjaq u kellna wkoll mumenti ta’ ferħ, bħal meta kellna x-xiri tal-każin aħna fl-1993.”
Huwa qalilna wkoll x’ra jinbidel fil-baned tul is-snin u x’għandu jsir sabiex il-banda f’pajjiżna tibqa’ attreanti, speċjalment għaż-żgħażagħ.
“Jekk inti ma tkunx attraenti, jiddispjaċini ngħid, li jintilfu ħafna miż-żgħażagħ li jkomplu fil-karriera mużikali ġol-baned. Tgħidli: għaliex? Il-baned m’għadhomx jibqgħu jdoqqu r-ripertorju l-antik biss, però rrid niġbed l-attenzjoni wkoll li mbagħad m’għandniex għalfejn nitraskuraw l-arkivji tagħna għax fl-arkivji tagħna hemm ħafna mużika li tirrakkonta l-istorja, speċjalment mużika Maltija.”
Huwa qal li t-tmiem tal-karriera tiegħu bħala surmast f’din l-Għaqda mużikali mhux xi ħaġa faċli.
“Li nħoss huwa li mhux ħaġa faċli għax li trabbejt fis-soċjetà, bħalma għidtlek, mill-1973, allura ili 49 sena dejjem attiv fil-banda – 30 sena minnhom kienu bħala surmast.”
Intant, sibna l-ħin ukoll sabiex nitkellmu mas-Surmast Mauro Farrugia, li se jkun qed jieħu b’mod uffiċjali l-inkarigu ta’ Surmast u Direttur ta’ din l-Għaqda Mużikali sabiex ikompli fuq ix-xogħol li ħalla warajh missieru.
“Naturalment, dan huwa privileġġ, hux vera, li nista’ nirċievi l-bakketta mingħand missieri stess. Mhijiex xi ħaġa li tiġri b’mod normali. Normalment, is-suċċessjoni ssir għal għand individwi differenti, però l-kumitat għoġbu jafdali l-kariga ta’ Surmast Direttur tal-Banda Queen Victoria. Naturalment, mhuwiex żarbun faċli li trid timla.”
Farrugia spjega wkoll kif il-programm mużikali mħejji huwa wieħed innovattiv u ġdid għal pajjiżna għax, għall-kuntrarju tal-format tradizzjonali ta’ dan it-tip ta’ programmi, il-banda se tkun qed takkumpanja servizz estensiv li jiddokumenta l-karriera tas-Surmast uxxenti Alfred Farrugia u li se jsawwar l-istruttura u l-andament tal-programm mużikali nnifsu.
Dan il-programm se jsir il-Ħamis 14 ta’ Lulju f’Misraħ ir-Repubblika fiż-Żurrieq wara marċ li jibda minn Triq l-Imqabba.
Ritratt: Daniel Spiteri
