Il-Partit Nazzjonalista qal li jekk xi ħadd ifittex dwar żidiet fil-pensjonijiet fi żmien Gvern Nazzjonalista, isib żgur.
Permezz tad-Deputat Nazzjonalista Albert Buttigieg, il-Partit Nazzjonalista saħaq dan meta mistoqsi jekk għolliex il-pensjonijiet aktar mill-COLA meta kien fil-poter.
Qal, “Bl-amment ma nistax ngħidlek, għax mhux xi ħaġa li żżommha, imma jekk tmur tfittex issib żgur.”
Il-fatti huma li Gvern Nazzjonalista ffriża l-pensjonijiet għal ħamsa u għoxrin sena mingħajr żieda u l-istess Gvern kien jagħti żewġ terzi tal-kumpens għall-għoli tal-ħajja, fi kliem ieħor mhux COLA sħiħa għall-pensjonanti.
Iżda t-track record tal-Partit Nazzjonalista fuq il-pensjonijiet, Buttigieg qal li l-affarijiet huma ċari.
Ġurnalist: “Kemm-il-darba l-Partit Nazzjonalista żied il-pensjonijiet akbar mill-COLA?”
Albert Buttigieg: “Naħseb jekk inti tmur tfittex u tara l-istatistika, naħseb hija ċara.”
B’rabta ma’ dak li qed jgħid il-Partit Nazzjonalista fuq il-pensjonijiet, il-Partit Laburista sostna li Gvern Laburista mhux biss hu garanzija ta’ pensjonijiet, iżda wkoll garanzija ta’ pensjonijjiet aqwa.
Fi stqarrija wara d-dikjarazzjonijiet mill-Partit Nazzjonalista, il-Partit Laburista saħaq li l-populisti tal-Partit Nazzjonalista qed jirrikorru għall-gideb għax m’għandhom ebda sustanza politika, lanqas dwar il-pensjonijiet.
Il-Partit Laburista kompla jgħid li, minflok tkompli tiftaħar b’dak li ġara qabel l-elfejn u tlettax, l-Oppożizzjoni għandha tikkundanna d-deċiżjoni tal-Gvern ta’ GonziPN li ddiskriminat ma’ dawk mwielda qabel l-1962, li spiċċaw jieħdu pensjoni inqas u kellu jkun dan il-Gvern bil-Baġit għal din is-sena li jibda jirrimedja s-sitwazzjoni.
