Kitba ta’ NORMA SALIBA, Kap tal-Komunikazzjoni tal-Partit Laburista
Il-mod kif tal-Partit Nazzjonalista qed jattakkaw b’mod sistematiku l-istituzzjonijiet tal-pajjiż huwa sinonomu ma’ kif jaħdmu partiti estremisti tal-lemin lil hinn minn xtutna. L-ewwel jippruvaw jimminaw il-fiduċja tal-elettorat f’dawn l-istituzzjonijiet u mbagħad jiftħu attakk frontali kontra hom biex jimminaw il-ħidma tagħhom. L-għan dejjem ikun li min ikun qed jaħdem f’dawn l-istituzzjonijiet iħossu mhedda u intimidat bit-tama li jċedi għall-pressjonijiet li jkunu qed isirulu u jiddeċiedi kif ikunu jridu dawn il-forzi tad-dlam.
Issa ilna bosta snin naraw iseħħ dan il-fenomenu fil-pajjiż. Nazzardaw ngħidu li l-attakki kontra l-istituzzjonijiet ħarġu wara l-elezzjoni tal-2013 li fiha l-poplu Malti ta fiduċja kbira lill-Partit Laburista u warrab min-nofs l-arroganza ta’ GonziPN li kien xeba’ minnha kulħadd. Meta tilfu l-poter b’daqstant saħħa kontraħom, in-Nazzjonalisti ħolmu li minkejja li ma kellhomx il-poter eżekuttiv f’idejhom, riedu jagħmlu minn kollox biex ifixklu l-programm tal-Gvern u jippruvaw jiddettaw l-aġenda tagħhom billi jużaw l-istituzzjonijiet, partikolarment il-Qrati.
Għandna elenku sħiħ tal-istituzzjonijiet li qed jattakkaw b’mod regolari n-Nazzjonalisti. X’ma kellniex? Attakki baxxi u personali kontra l-Kummissarju tal-Pulizija u l-Korp kollu. Attakki mill-aktar baxxi fil-konfront tal-Avukat Ġenerali u tal-Avukat tal-Istat. Attakkaw ukoll lis-Servizz Pubbliku, b’mod partikolari uffiċjali għolja taċ-Ċivil fosthom Segretarji Permanenti li l-ħtija tagħhom kienet biss li qed jaqdu dmirhom skont il-liġi, lejn il-poplu Malti. Biex jagħmlu dan sabu soluzzjoni fil-fatt li kellna Gvern Laburista li għażel li jieħu t-triq li jsaħħaħ id-demokrazija u l-istituzzjonijiet f’pajjiżna b’riformi bla preċedent li wħud minnhom in-Nazzjonalisti baqgħu jirrifjutaw li jintroduċu anke minkejja pressjonijiet kbar interni li kellhom.
Gvern Laburista, minn raħih u mingħajr ħadd ma ġiegħlu, reħa minn idejh poteri kbar li kellu l-Prim Ministru fuq il-ħatra tal-ġudikatura, fuq il-ħatra tal-Avukat Ġenerali, fuq il-ħatra tal-Kummissarju tal-Pulizija, poteri li n-Nazzjonalisti qatt ma riedu jerħu minn idejhom. Kellna sitwazzjoni fejn biex tilħaq Maġistrat jew Imħallef ridt tkun persuna li tkun qrib ħafna ta’ xi ministru jew tal-Prim Ministru stess. Anke meta kellhom is-saħħa tal-poter f’idejhom, in-Nazzjonalisti f’Malta għażlu li jattakkaw l-istituzzjonijiet meta dawn ma ddeċidewx kif riedu huma.
Għandna l-eżempju klassiku ta’ meta kellna Prim Ministru Nazzjonalista li meta ġuri ma nqatax kif ried hu, l-għada ħareġ jgħid li għandna nneħħu s-sistema tal-ġurijiet. L-attakki riċenti tal-esponenti tal-Għaqda Repubblika f’appelli li ressqu għal sentenzi li nqatgħu kontraħom fuq inkjesti fażulli li talbu li jsiru kontra esponenti Laburisti u l-familjari tagħhom huma bla preċedent f’dan il-pajjiż. Li tressaq appell huwa normali f’sistema ġudizzjarja imma li għax ma taqbilx ma’ deċiżjoni ta’ ġudikant titlob li jittieħdu passi kriminali kontrih, huwa att ta’ min jistmerru u juri f’liema estremiżmu waqgħu dawn il-forzi. U mhux hekk biss, marru fil-Qorti jgħargħu mentaw fuq l-appell u talbu saħansitra li jiġu kkonfiskati laptops ta’ Maġistrati.
Huwa inutli għall-Partit Nazzjonalista li jipprova jżomm distanza minn dawn in-nies. Dawn ġejjin mill-qaċċa tal-Partit Nazzjonalista. Dawn huma ħaġa waħda mal-fergħa estremista tal-Partit Nazzjonalista li llum faċilment wieħed jista’ jgħid li nħataf mill-kap de facto Karol Aquilina li qed jiddetta l-aġenda estremista tal-Partit. Dan kompla joħroġ ċar fil-Parlament din il-ġimgħa meta l-Kap dgħajjef Nazzjonalista, Bernard Grech, kellu jbaxxi rasu għall-fergħa estremista tal-Partit u joħroġ lid-deputati kollha Nazzjonalisti mill-Parlament biex jevita li jkollu vot maqsum dwar il-mozzjoni li ressaq il-Gvern biex jintwera solidarjetà mal-Ispeaker Anġlu Farrugia.
L-attakki isterici li saru fil-Parlament kontra l-Ispeaker tal-Kamra tad-Deputati huma wirja oħra tal-estremiżmu faċxista fl-attakki tan-Nazzjonalisti kontra l-istituzzjonijiet tal-pajjiż. L-istess bħal f’okkażjonijiet oħra, għax ma qablux ma’ deċiżjonijiet tas-Sedja, ħarġu bl-aktar mod feroċi kontra l-persuna tal-Ispeaker u mhux jikkritikaw id-deċiżjonijiet imma jattakkaw personalment lill-persuna b’tgħajjir u insulti li wieħed lanqas għandu jagħmel barra fit-triq, aħseb u ara fl-ogħla istituzzjoni tal-pajjiż.
Issa qed naraw lill-PN jerġa’ jmur lura għal żmien GonziPN u jinħataf mill-fergħa estrema tal-Partit. Ftit hemm tama li dan l-att tagħġja estremista u perikoluża, li jixtebah sew mal-mod kif imexxu l-politika l-aktar parti tal-lemin estrem fl-Ewropa, ibatti fiż-żmien li ġej. Irid ikun il-Partit Laburista li jkompli b’mod sod biex iwettaq il-mandat li tah il-poplu. Dan kien mandat b’saħħtu biex Gvern Laburista joħloq il-ġid lill-poplu Malti u ma jħallix lin-Nazzjonalisti jfixklu l-ħidma tiegħu b’dawn il-maniġġi u l-estremiżmi li qed juru bħalissa. L-għaqda fil-Partit Laburista wara t-tmexxija tal-Prim Ministru Robert Abela hija l-garanzija li minkejja kollox, il-pajjiż jibqa’ miexi ’l quddiem u jkompli jinħoloq il-ġid biex il-livell tal-għajxien tal-poplu Malti jkompli jitjieb.
