L-espert tal-Qorti Keith Cutajar ikkonferma li l-eks Ministru Nazzjonalista u Avukat tal-għaqda Repubblika, Jason Azzopardi, ipprova jagħmel kuntatt miegħu ftit jiem qabel saret it-tfittxija fid-dar tal-eks Prim Ministru Joseph Muscat.
Cutajar qal li Azzopardi ma pprovax jagħmel kuntatt miegħu biss, iżda għamel dan anke ma’ uffiċjali tal-Pulizija.
L-espert kien qiegħed jixhed fil-proċeduri quddiem il-Maġistrat Rachel Montebello, b’rabta mal-inkjesta tal-isptarijiet, kontra Dr Muscat u numru ta’ persuni oħrajn.
Mistoqsi mill-Avukat Vince Galea, li qed jidher għall-eks Prim Ministru, kemm-il darba rċieva telefonati mingħand Azzopardi, l-espert l-ewwel wieġeb aktar minn darba, imbagħad speċifika li ċempillu ħames darbiet.
Cutajar qal li hu lanqas kellu numru ta’ Azzopardi fil-mowbajl tiegħu, iżda, meta wera n-numru lill-Maġistrat Gabriella Vella, kienet hi li identifikat in-numru u qaltlu li dak kien in-numru tal-eks Deputat u avukat tal-għaqda Repubblika.
L-espert qal li hu ma weġibx għat-telefonati kemm għax kien qiegħed isuq il-mutur, iżda anke għax wara l-ftuħ tal-inkjesta bdew jidhru diversi artikli fil-gazzetti li, fi kliemu, għamluh iżjed konxju kif iġib ruħu.
Cutajar spjega kif meta ma weġibx it-telefonati ta’ Azzopardi, dan tal-aħħar beda jibgħatlu l-messaġġi bis-sistema Signal. Mistoqsi x’kien fihom dawk il-messaġġi, l-espert tal-Qorti l-ewwel wieġeb li ma jiftakarx, għax ghadda ż-żmien, waqt li mbagħad tenna li kienu jgħidu xi ħaġa fis-sens li Azzopardi qallu biex iċempillu għax ried ikellmu.
L-Avukat Galea staqsa lil Cutajar x’għamel wara li rċieva dawn il-messaġġi, bix-xhud jgħid li hu mar bihom għand il-Maġistrat Gabriella Vella u mistoqsi jekk din talbitux iżomm kopja tagħhom fid-dokumentazzjoni relatata mal-inkjesta, l-espert wieġeb li le.
Żied li eventwalment kellha tinbidel id-data ta’ meta saret it-tfittxija fid-dar ta’ Dr Muscat.
L-espert intalab mill-Avukat Galea jiċċekkja dak il-ħin il-mowbajl tiegħu biex jara jekk il-messaġġi ta’ Jason Azzopardi għadhomx hemm. Iżda wara ftit tal-ħin, qal li ċ-chat ma’ Azzopardi hi vojta.
Meta mistoqsi kif dawn m’għadhomx fuq il-mowbajl tiegħu, Cutajar stqarr li hu ssettja l-profil tiegħu ta’ Signal b’mod li, wara ċertu żmien, il-messaġġi jitħassru waħedhom.
Aktar qabel, Cutajar ippreżenta lill-Qorti rapport dwar xogħol li hu għamel fuq il-mobile phone tal-eks Prim Ministru bil-għan li l-informazzjoni li ġabar tingħata lill-Prosekuzzjoni u lill-avukati tad-Difiża.
L-Avukat Galea talab li l-informazzjoni fil-mowbajl li mhix relatata mal-inkjesta ma tingħatax la lill-Prosekuzzjoni u lanqas lid-Difiża. Żied li jekk hemm xi informazzjoni relatata din tista’ tingħata mingħajr problema.
Jekk ma jsirx hekk, sostna l-Avukat Galea, se tkun qed issir biss fishing expedition, għax il-Prosekuzzjoni suppost li meta ressqet lill-akkużati quddiem il-Qorti, kellha l-provi neċessarji. Żied li, fil-każ ta’ Daphne Caruana Galizia, il-Qorti qabbdet imħallef irtirat biex jara hu x’kien hemm bħala informazzjoni privata.
L-avukat talab lill-Qorti biex taħtar espert li jiddetermina hu r-relevanza tal-kontenut tal-mowbajl ta’ Dr Muscat għall-proċeduri fil-Qorti b’rabta mal-inkjesta. U sakemm isir dan, il-kontenut tal-mowbajl jibqa’ għand il-Maġistrat Rachel Montebello. Ma’ din it-talba qablu l-avukati kollha tad-Difiża.
L-Avukati mill-Uffiċċju tal-Avukat Ġenerali oġġezzjonaw bl-Avukat Galea jirrimarka li dawn allura jridu li anke affarijiet privati u personali tal-familja tal-eks Prim Ministru, li mhumiex relatati mal-inkjesta, isiru pubbliċi. Il-Maġistrat Montebello se tagħti d-deċiżjoni tagħha fil-ġranet li ġejjin f’dan ir-rigward.
Sadanittant l-espert ewlieni fl-inkjesta Jeremy Harbinson reġa’ ma kienx preżenti biex jixhed, bil-Maġistrat tinforma lill-avukati tad-Difiża li l-Uffiċċju tal-Avukat Ġenerali għamel talba biex dan jixhed minn Qorti fir-Renju Unit, bl-għajnuna tal-awtoritajiet Ingliżi, permezz tal-video conferencing.
L-Avukat Franco Debono staqsa għax qed tkun adottata din is-sistema, li mhix normali, minflok ix-xhud jiġi Malta u jixhed minn fuq il-pedana. Iżda l-Prosekuzzjoni wieġbet biss li qed jagħmlu dan, għax Harbinson jgħix barra minn Malta.
