Għall-ħabta tas-sagħtejn u nofs tat-Tlieta waranofsinhar f’pajjiżna wasal l-ewwel ajruplan tal-Malta Air tat-tip Boeing 737-8200 li jħaddan il-kuluri tal-bandiera Maltija.
L-ajruplan meqjus minn ħafna bħala ‘gamechanger’ fl-industrija tal-avjazzjoni minħabba l-effiċjenza tiegħu fost oħrajn kien milqugħ mill-Ministru għat-Trasport Ian Borg, il-Kap Eżekuttiv tar-Malta Air David O’Brien u l-Kaptan Charles Pace f’isem Transport Malta.
Dan l-ajruplan wasal f’pajjiżna wara investiment ta’ mitt miljun ewro.
F’konferenza tal-aħbarijiet ftit wara l-wasla tal-ajruplan bil-kuluri bojod u ħomor, f’konferenza tal-aħbarijiet intqal kif dan huwa wieħed minn totall ta’ sitt ajruplani li se jkunu bbażati f’Malta tul l-istaġuni tas-sajf u x-xitwa.
ONE News tkellem ma’ O’Brien hekk kif spjega l-effiċjenza ta’ dan it-tip ta’ ajruplan li fis-Sajf f’pajjiżna flimkien mal-ħames ajruplani l-oħra se jkun qed itir totall ta’ 57 rotta.
O’Brien spjega kif dan it-tip t’ajruplan jaħli ferm inqas fjuwil u huwa ferm iżjed ħabib tal-ambjent.
Qal, “We call it the gamechanger because it delivers phenomenal efficiency. It burns 16% less fuel, it emits 16% less CO2 emmissions and a phenomenal 40% noise reduction so all in all it further enhances the leadership position of Ryanair Group and Malta Air as an environmental leader.”
O’Brien sostna kif il-pjan ’il quddiem huwa li Malta Air żżid erba’ ajruplani oħra għal totall ta’ għaxra sabiex jiżdiedu r-rotot.
Fil-fatt tenna kif fix-Xitwa li ġejja Malta Air se jkollha disa’ rotot ġodda għal totall ta’ 59 rotta.
Spjega, “In the Winter we have 9 new routes from Eindhoven to Bucharest to Zagreb, Kiev, Paphos in Cyprus in Milan Malpensa and many many more all available by the way at €19.99 on our website so book now and book early.”
Minn naħa tiegħu l-Ministru Ian Borg tenna s-sodisfazzjon tiegħu għal dan l-ajruplan ġdid li issa se jtajjar il-bandiera Maltija. Tenna li b’hekk din hija konferma oħra ta’ kemm Malta għandha tkun kburija bis-settur tal-avjazzjoni tagħha.
Qal, “Hawnhekk qed naraw ukoll kif b’mod kompettitiv l-awtoritajiet qed jiġbdu iżjed xogħol lejn pajjiżna. Ħadt pjaċir pereżempju nara l-Kaptani li kienu qed itajjru din it-titjira li kienu Maltin u allura tara anke żgħażagħ Maltin li qed jaħdmu fis-settur tal-avjazzjoni li jħallas u jħallas tajjeb.”
