Żewġ qaddiefa embarkaw fuq qadfa li se toħodhom madwar il-kosta Maltija, bil-għan li jiġbru l-flus biex tinbena skola fl-Etjopja.
Anthony Delia u Derome Agius telqu minn Baħar iċ-Ċagħaq u ser ikunu qegħdin iduru d-dawra ta’ Malta.
Fuq Facebook, Delia tella’ ritratt ta’ mappa bil-ħinijiet u l-postijiet allokati sabiex wieħed ikun jista’ jsegwi fejn ikunu waslu fl-sifida tagħhom.
F’kummenti li ta lil ONE News qabel ma bdew l-isfida tagħhom kmieni s-Sibt filgħodu, Delia stqarr li huma se jduru u mistennija jaslu lura f’Baħar iċ-Ċagħaq tmintax-il siegħa wara t-tluq tagħhom għall-ħabta tas-siegħa tal-Ħadd 9 ta’ Lulju.
“Involuti kif qed tara hawn jiena, Derome Agius, ħabib tiegħi li ħa jkun qed jaqdef miegħi, għandna l-AlphaMedical li ħa jassistina tul it-traġitt kollu u r-Ritz Kayaks talli sellifna l-aċċessorji.”
Huwa spejga wkoll għalfejn qegħdin jinġabru l-flus b’rabta ma’ din l-isfida li qiegħed jagħmel, li se tkun qed tara l-binja ta’ skola fl-Etjopja iżda mhux biss.
“Lil hinn mill-binja essaċċ, jekk nagħtu l-edukazzjoni l-dawn it-tfal inkunu qed intuhom futur u ovvjament il-futur qed nagħtuhom il-ħajja diċenti li għandhom neċessarja.”
Qabel ma bdew il-qadfa tagħhom, Anthony rringrazzja lil kull min kien preżenti u lil dawk kollha nvoluti filwaqt li għadda appell lil pubbliku.
“L-appell tiegħi huwa li dawk kollha li qed jisimgħuna, jingħaqdu magħna f’din il-qadfa billi jkunu jistgħu jagħtu donazzjonijiet, jidħlu fil-webpage fil-Facebook page tagħna, hemmhekk hemm post fejn jistgħu jagħtu d-donazzjoni tagħhom u mqar lil hinn mill-ammont finanzjarju, jekk b’din il-qadfa jirnexxielna nikkonvinċu nies oħra jagħmlu att kif qed nagħmlu aħna, la kapaċi nagħmluha jiena u Derome, kapaċi intom ukoll tgħinu l-ħaddieħor.
Wieħed jista’ jagħti donazzjoni permezz ta’ Revolut fuq in-numru: 79520171.
