Iż-żagħżugħ ta’ 19-il sena, Jacob Zammit, huwa r-rebbieħ tal-ewwel stadju tal-Kampjonat Nazzjonali taċ-ċess – il-Preliminarji. Zammit, li beda dan il-Kampjonat ikklassifikat fis-7 post, rebaħ 5 logħbiet u ġab żewġ draws, sabiex akkwista total ta’ 6 punti. Viċin fit-tieni post, Steve Mizzi spiċċa fuq 5½ punti. Bl-istess punteġġ, Alex Farrugia spiċċa fit-tielet post. Farrugia rnexxielu jtemm it-turnew bla ma sofra ebda telfa, b’4 rebħiet u 3 draws.
Erba’ plejers segwew fuq 5 punti, biex akkwistaw mir-4 sas-7 post. Karl Saliba ukoll spiċċa l-kampjonat mingħajr ma tilef l-ebda logħba, dan wara li rebaħ l-ewwel 3 logħbiet u ġab draw fl-4 l-oħra; riżultat li ggarantielu kwalifikazzjoni għal fażi li jmiss. Is-sorpriża tal-Kampjonat kienet Martina Portelli. Portelli lagħbet logħob pożittiv ħafna, rebħet 4 logħbiet, ġabet 2 draws, u telfa waħda fl-aħħar round. Portelli kienet il-plejer li l-iktar akkwistat rating points f’din il-kompetizzjoni.
Il-favurit Krishnan Muthukumar, kiseb is-6 post fuq 5 punti, filwaqt li l-plejer żagħżugħ Andrei Dobbin ikklassifika fis-7 post wara li iggwadanja 4 punti fl-aħħar 5 logħbiet.
Il-Preliminarji ta’ din is-sena kienu wħud mill-iktar eċċitanti u kompetittivi riċentament. Fl-aħħar żewġ logħbiet, iktar minn nofs il-parteċipanti kellhom iċ-ċans li jikkwalifikaw (l-ewwel 10 fil-klassifika jgħaddu għall-Kandidati). Dawn l-unuri finalment spiċċaw għand Isaac Grima Bongailas, Ian Refalo u Claude Licari. Grima Bongailas, l-iżgħar parteċipant li kkwalifika fl-età ta’ 13-il sena, kiseb 4½ punti permezz ta’ 4 rebħiet u draw. Bl-istess punteġġ, Refalo u Licari ikkwalifikaw fid-9 u fl-10 post rispettivament. Sfortunatament għal Andrea Abela, għalkemm akkwista 4½, huwa ma rnexxielux jikkwalifika minħabba riżultat ta’ tie-break inferjuri.
F’dan il-Kampjonat, total ta’ 28 plejer ħadu sehem, 11 minnhom kienu bla rating. L-aqwa unrated plejer kienet Ella Miceli-Farrugia, li akkwistat 4 punti, flimkien ma’ Matthew Portelli, Marco Grech u Thomas Falzon. Dawn il-plejers, flimkien ma’ 4 oħra, irnexxielhom jakkwistaw rating internazzjonali wara dan il-turnew.
It-tieni fażi tal-Kampjonat Nazzjonali taċ-Ċess, il-Kandidati, se jsiru f’Lulju. L-10 kwalifikanti mill-Preliminarji ser jingħaqdu ma’ plejers li għandhom rating ta’ 1800 jew iktar. L-ewwel 4 jikkwalifikaw għall-aħħar fażi, il-Kampjonat Finali.
Dettalji tat-turnew jinsabu fuq dan is-sit: https://chess-results.com/tnr880589.aspx
