Statistika dwar iż-żwiġijiet turi kif fuq perjodu ta’ tmien snin dawk il-koppji li għażlu li jiżżewġu biċ-ċivil telgħu minn 740 għal 1,349, li jfisser li kważi rdoppjaw.
Matul l-istess perjodu, il-koppji li żżewġu bil-Knisja niżlu minn 1,547 fl-2010 għal 1,208 matul is-sena li għaddiet. Dan wassal biex għat-tieni sena konsekuttiva ż-żwiġijiet biċ-ċivili qabżu sew iż-żwiġijiet bil-Knisja.
Dan jippreżenta stampa ferm differenti mill-elfejn u għaxra meta prattikament il-koppji li għażlu li jiżżewġu biċ-ċivil kienu biss in-nofs. Fl-istess perjodu, iż-żwiġijiet bil-Knisja naqsu bi kważi mitejn u ħamsin.
ŻWIĠIJIET RELIĠJUŻI ŻWIĠIJIET ĊIVILI
2017 1,208 1,394
2010 1,547 740
Il-fatturi għal dan it-tibdil huma bosta fosthom soċjetà aktar sekulari; l-introduzzjoni tad-divorzju u għaldaqstant tat-tieni żwieġ biċ-ċivil; flimkien maż-żwieġ ċivili għal persuni tal-istess sess, kif ukoll iż-żwiġijiet ta’ koppji barranin fil-gżejjer Maltin.
Dwar dan il-fenomenu Dun Ġorġ Dalli, jistqarr li mhux maħsud b’dawn iċ-ċifri, anke għaliex it-tnaqqis naħa u ż-żieda fin-naħa l-oħra ma jikkorrispondux.
L-ewwel nett innota d-differenza bejn żwieġ fil-knisja, u bil-knisja. Bidla li jemmen li waslet minħabba li naqsu l-pressjonijiet kulturali u tradizzjonali.
Huwa jsemmi wkoll kif għadd ta’ koppji li jiżżewġu biċ-ċivil jmorru għand saċerdot biex iberkilhom iż-żwieġ.
Dun Ġorġ qal lil ONE News: Kieku jkollok tgħodd lil dawk in-nies (nitkellem mill-esperjenza) li jiżżewġu biċ-ċivil, u mbagħad wara jiġu għand il-qassis ħalli jbierek iż-żwieg tagħhom, mhux b’mod formali imma b’mod spiritwali; għax iridu jistednuh lil Ġesu’ fir-relazzjoni tagħhom, ngħidlek li din l-istatistika taż-żwiġijiet insara, jerġa’ jkunu iktar minn ta’ 7 snin ilu.
Jemmen li xorta waħda l-Knisja għandha tħares lejha nnifisha, u tenna li l-Papa Franġisku nnifsu jinsisti li l-Knisja trid tibdel il-viżjoni.
Żied jgħid li jemmen li l-Knisja trid tassigura wkoll li l-preparamenti għal koppji żgħażagħ ikun tajjeb, għaliex f’bosta aspetti jħoss li hemm nuqqasijiet.
Fuq kollox però kellu appell għal dawk kollha miżżewġin, u dawk li se jaqbdu dik it-triq.
