Is-sitta u tletin vjaġġ Appostoliku tal-Papa Franġisku f’pajjiżna qed ikun irrappurtat mill-midja internazzjonali bi prominenza liema bħalha.
Bosta siti internazzjonali qegħdin jgħidu kif il-Kap tal-Knisja Kattolika qed isegwi l-passi ta’ San Pawl, meta ġie f’pajjiżna fis-sena sittin Wara Kristu.
Fuq l-ajruplan fi triqtu lejn pajjiżna, ġurnalist internazzjonali staqsa lill-Papa Franġisku jekk hux sejjer Kyiv f’nofs il-gwerra, bil-Papa wieġeb li qed jikkunsidra dan bis-serjetà.
B’din ir-risposta skjetta tolqot l-aħbarijiet internazzjonali, fosthom The Guardian. Din qalet li l-Papa Franġisku li qed jikkunsidra li jmur ġewwa l-Ukrajna, fejn għaddejja bħalissa l-gwerra.
Il-midja internazzjonali nnutat ukoll kif għall-ewwel darba f’Malta l-Papa Franġisku kkritika b’mod indirett lill-President Russu Vladimir Putin minħabba l-gwerra fl-Ukrajna.
Hawnhekk huma rreferew għad-diskors li l-Papa għamel fil-Palazz tal-President fejn tkellem dwar kunflitti minħabba n-nazzjonaliżmu.
Is-sit internazzjonali Politico rrapporta wkoll id-diskors tal-Papa, fejn minkejja li ġie rrappurtat li kritika lill-President Russu, intqal kif il-Papa ma semmiex isem Vladimir Putin.
F’dan l-artiklu ntqal kif il-Papa Franġisku uża ż-żjara f’Malta bħala opportunità sabiex jappella għall-waqfien mill-ġlied.
Is-sit Vatican News irrapporta kif il-Papa Franġisku qal kif Malta, fil-qalba tal-Mediterran għandha tkun strument ta’ paċi. Huwa talab sabiex f’Malta u anki fl-Ewropa jkun hemm il-paċi.
Is-sit Euronews irrapporta kif il-Papa kkundanna l-gwerra fl-Ukrajna.
Kien hemm dawk li qablu din iż-żjara ma’ dik ta’ San Pawl, fosthom is-sit Vatican News bit-titlu “Pope in Malta in the footsteps of Saint Paul”. F’dan l-artiklu ntqal ukoll kif din hija r-raba’ żjara Papali, wara ż-żewġ żjarat ta’ Papa Ġwanni Pawlu II u Papa Benedittu XVI.
Is-sit France 24 qal ukoll kif kif il-Papa Franġisku jinsab f’pajjiżna. Dan is-sit irrapporta wkoll kif il-Ġimgħa, il-Papa qal li huwa se jmur bħall-vjaġġ ta’ San Pawl Appostlu.
F’artiklu ieħor fuq is-sit Reuters ġie nnutat kif il-Papa Franġisku niżel fil-mitjar Malti mill-ajruplan permezz ta’ lift, minħabba x-xatka. F’dan l-artiklu ntqal kif il-Papa jinsab fi stat ta’ saħħa tajba, iżda għandu uġigħ f’irkuptejh u f’saqajh.
Is-sit Rome Reports ukoll semma l-fatt li l-Papa niżel mill-ajruplan permezz ta’ lift.
