Iż-żieda għal dawk bil-paga minima spjegata

L-impjegati li ilhom sena bil-paga minima mhux biss se jgawdu miż-żieda maqbula fil-ftehim iffirmat bejn il-Gvern u l-imsieħba soċjali f’April, iżda se jgawdu wkoll miż-żieda tal-aġġustament għall-għoli tal-ħajja, u s-suppliment għall-paga minima.

Biex b’hekk, kull impjegat bil-paga minima li għandu minn tal-inqas tmintax-il sena u ilu iżjed minn tnax-il xahar fl-istess impjieg, se jiżdied b’ewro u ħamsa u sebgħin ċenteżmu fil-ġimgħa tal-COLA, ewro ieħor fil-ġimgħa suppliment skont il-ftehim maqbul dwar il-paga minima, u tliet ewro oħra skont kif maqbul mal-imsieħba soċjali fit-tmienja u għoxrin t’April li għadda.

Dawn jerġgħu jiżdiedu mat-tieni sena fl-istess impjieg, kif spjegat Sandra Gatt – id-Direttur tad-Dipartiment għar-Relazzjonijiet Industrjali u x-Xogħol.

Hi qalet li “Dak il-persuna li s-sena d-dieħla ħa jagħlaq sentejn fl-istess post tax-xogħol, dik il-paga ħa tiżdiedlu bi 3 euros oħra, 1 euro tas-suppliment u 1.75 tal-COLA jiġifieri l-paga ta’ dak il-persuna mit-2016 sat-2018 ħa tkun żdiedet b’8.75.”

Dawk li m’għandhomx tmintax-il sena jew m’ilhomx sena fl-impjieg, iżda xorta jitħallsu bil-paga minima, ukoll se jaraw żieda fil-pagi tagħhom.

L-impjegati ta’ sittax-il sena bil-paga minima bħalissa jitħalsu mija u sittin ewro u erbatax-il ċenteżmu fil-ġimgħa.

Biż-żieda tal-COLA, u s-suppliment t’ewro ieħor fil-ġimgħa, se jibdew jitħallsu mija tnejn u sittin ewro, disgħa u tmenin ċenteżmu fil-ġimgħa.

L-istess żidiet japplikaw għal min għandu sbatax u tmintax-il sena, u beda jitħallas bil-paga minima.

Biex dawk ta’ sbatax-il sena, minn mija tnejn u sittin ewro u tmienja u disgħin ċenteżmu fil-ġimgħa, se jibdew jitħallsu mija ħamsa u sittin ewro u tlieta u sebgħin ċenteżmu.

Filwaqt li dawk ta’ tmintax-il sena, minn mija disgħa u sittin ewro u sitta u sebgħin ċenteżmu fil-ġimgħa, se jiżdiedu għal mija tnejn u sebgħin ewro u wieħed u ħamsin ċenteżmu.

Dan kollu jmur id f’id ma’ miżuri oħra fil-baġit għall-elfejn u tmintax. Baġit li jaħseb f’kulħadd, u qed ilesti lil pajjiżna għall-futur.