“Huwa importanti li l-Ewropa tersaq dejjem eqreb lejn iċ-ċittadini tagħha, inkluż iż-żgħażagħ billi toffrilhom opportunitajiet Ewropej li jwasslu sabiex ikun hemm anke involviment dirett fil-politika li nfasslu. Iż-żgħażagħ mhumiex biss il-futur, iżda l-preżent”. Stqarret dan l-Ewroparlamentari Ewropew Josianne Cutajar fl-okkażjoni tal-European Youth Event 2021 li qed isseħħ bħalissa fil-Parlament Ewropew fi Strasburgu, avveniment annwali li din is-sena qed jħeġġeġ diskussjoni relatata mal-futur tal-Ewropa, fl-isfond tal-Konferenza tal-Futur tal-Ewropa li Cutajar hi r-rappreżentanta Maltija għas-Soċjalisti fiha.
Cutajar sostniet li l-enfasi għandha tkun b’tali mod li ż-żgħażagħ ma jintużawx bħala ‘token’, iżda li tinvolvihom fil-proċess sħiħ u b’mod effettiv.
Hija saħqet fuq l-importanza li jkunu inklużi żgħażagħ minn sferi differenti tas-soċjetà, speċjalment dawk li qed jaffaċċjaw diversi sfidi, b’mod inklussiv. Dr Cutajar fakkret kif dan għamlitu wkoll waqt diskussjoni li organizzaw is-Soċjalisti u Demokratiċi relatata mal-Konferenza tal-Futur tal-Ewropa f’Malta, fejn saret stedina liż-żgħażagħ Maltin u Għawdxin minn għaqdiet differenti u minn realtajiet differenti.
L-għaxar żgħażagħ Maltin u Għawdxin li qed jieħdu sehem fil-European Youth Event fi Strasburgu kellhom iċ-ċans li jżuru l-istituzzjonijiet u jiltaqgħu mal-Membru Parlamentari Ewropew Josianne Cutajar.
Permezz ta’ din l-esperjenza se jkollhom ukoll l-opportunità li jiltaqgħu u jaqsmu l-ħsibijiet tagħhom ma’ żgħażagħ oħra Ewropej fejn se jkunu qed jipparteċipaw f’numru ta’ diskussjonijiet marbuta mal-ħidma tal-Unjoni Ewropea u anke l-futur tal-Ewropa.
Dr Josianne Cutajar li hija l-iżgħar membru tad-delegazzjoni Maltija u l-iżgħar persuna li qatt ġiet eletta minn pajjiżna, qed timbotta ‘l quddiem l-opportunità li taħt il-programm DiscoverEU, li permezz tiegħu żgħażagħ Ewropej ta’ bejn it-18 u l-20 sena se jkunu jistgħu jsiefru fl-Ewropa u jifhmu u japprezzew aħjar kulturi oħra Ewropej u l-valuri tal-Unjoni Ewropea.
