Il-persuna f’idejn il-pulizija b’rabta mal-qtil ta’ Pollakka ta’ 29 sena huwa Abner Aquilina.
Huwa għandu 20 sena, jgħix iż-Żejtun u huwa s-suspettat li qatel lill-mara.
Aquilina ġie arrestat ftit wara li nstab il-katavru tal-Pollakka bl-isem ta’ Paulina Dembska.
Sorsi li tkellmu ma’ ONE News qalu li Aquilina ġie arrestat fil-Knisja tal-Balluta f’tas-Sliema wara li qajjem kommossjoni kmieni l-Ħadd filgħodu.
Allegatament Aquilina tela’ fuq l-artal u qaleb sedja u leġiju.
Filwaqt li ħasad lil dawk kollha li kienu fil-Knisja jistennew biex tibda l-ewwel quddiesa tal-ġurnata, nifhmu li raġel li kien preżenti ħareġ lil Aquilina barra mill-Knisja.
F’dan il-waqt jista’ jagħti l-każ li Aquilina lissen xi kliem dwar l-omiċidju f’tas-Sliema.
Kelliem mill-uffiċċju tal-komunikazzjoni tal-Korp tal-Pulizija kkonferma li r-raġel ġie arrestat barra l-Knisja wara l-kommossjoni li qajjem u wara li daħlilhom rapport separat.
Ftit tal-ħin wara li nstab il-katavru tat-tfajla, ONE News żvela li t-tfajla nstabet imneżża mill-ħwejjeġ u jista’ jkun li ġiet stuprata qabel fil-fatt inqatlet.
F’rasha nstabu wkoll xi ġrieħi.
Din l-informazzjoni baqgħet ma ġietx ikkonfermata mill-Kelliem għall-Korp tal-Pulizija Brandon Pisani iżda l-informazzjoni li għandu f’idejh ONE News tindika li filwaqt li l-Pulizija qed tinvestiga d-dinamika tal-każ, kollox jindika li allegatament seħħ abbuż sesswali fuq it-tfajla.
Intant xi nies marru fi ġnien l-Indipendenza jitfgħu l-fjuri biex isellmu l-memorja tal-Pollakka.
Xi persuni li tkellmu ma’ one.com.mt qalu li l-vittma kienet voċifera fuq id-drittijiet tan-nisa.
Fi stqarrija l-Fondazzjoni għall-Ħarsien Soċjali qalet li waqt li għadu mhux ċar x’ġara, l-FSWS innutat b’dispjaċir li l-ewwel vittma ta’ omiċidju din is-sena hija mara.
“L-ebda omiċidju ma huwa aċċettabbli, wisq aktar femiċdju li jirriżulta minn sitwazzjoni ta’ vjolenza domestika”, sostniet l-FSWS.
F’dan il-kuntest, l-FSWS ħeġġet lil kull mara li tista’ tkun qed tgħix f’sitwazzjoni ta’ vjolenza domestika biex tfittex l-għajnuna billi ċċempel 179 jew tirrapporta fuq is-sit tal-FSWS.
