Ix-xogħol ta’ tiswija tal-Pont ta’ Gomorino li jgħaqqad l-Imtarfa mal-Imdina u r-Rabat għaddej ġmielu u mistenni jkun lest ix-xahar id-dieħel. Dan il-pont li jaqsam il-Wied ta’ Għeriexem fir-Rabat hu wieħed skedat u x-xogħol qed isir mid-Dipartiment tax-Xogħlijiet Pubbliċi.
Gaetano Vella mill-istess Dipartiment qal li qed isir restawr fuq il-parapett ta’ dan il-pont li minn fuqu kienet tgħaddi l-ferrovija tul is-seklu l-ieħor u llum il-ġurnata dan il-pont jintuża għall-użu rikreattiv.
Qal, “Pont li nbena fl-1900, mija u tnejn u għoxrin sena ilu, u l-ħsarat li saru matul is-snin kienu konsiderovoli fosthom fejn tidħol l-istruttura. Allura ġie deċiż li jinqala’ l-wiċċ eżistenti jsiru l-pedamenti tat-triq li twassal mit-triq tal-Imtarfa sal-Imdina u viċi versa. Anke se jsir ukoll tisħiħ tat-truf ta’ dan il-parapett fejn se jitneħħa l-ħajt li hemm u se jsiru railings tal-ħadid għax kien ta’ periklu u aħna rridu l-viżibiltà tal-veduta”
Ser tinbena bankina ġdida biex tkun tista’ tintuża minn dawk li jkunu qed jimxu, b’hekk il-post isir aktar aċċessibbli u sigur għal min ikun irid jimxi fl-inħawi.
Qal, “Fejn huwa possibbli dejjem f’interventi bħal dawn aħna ninkludu bankini u pavimentar li jkunu b’ċertu materja u ma jkunx ta’ periklu għal min jgħaddi minn fuqhom. Se jkun hawn bankini fuq żewġ naħat li huwa mportanti li meta jsir dan ix-xogħol nibżgħu għalih, għax li nibżgħu li jsir vandaliżmu x’ħin inlestu.”
F’dan il-proġett ukoll se jkun hemm dawl ġdid u modern li juża anqas enerġija filwaqt li s-servizzi eżistenti ser jgħaddu kollha minn taħt il-bankina.
Qal, “Xi ħaġa importanti wkoll li qed isir it-tiżbir tas-siġar li hawn u li qed isir b’mod sensittiv ukoll u qed jitħawlu siġar indiġeni oħra biex dan l-ambjent nagħmluh aktar sostennibli.”
Ix-xogħol b’investiment ta’ sitt mitt elf ewro qed isir fuq pjanti oriġinali ta’ meta nbena dan il-pont, sabiex dan il-pont jerġa’ lura għal glorja oriġinali tiegħu.
Qal, “Tajjeb li ngħidu li aħna għandna l-pjanti oriġinali ta’ meta nbena għax irridu ngħidu lill-Public Works għandu arkivji ta’ numru ta’ pjanti li jmorru lura għal żmien il-kavallieri u iva aħna dejjem fejn hu possibli nkunu leali lejn il-pjanti oriġinali. Din hu l-ewwel parti ta’ dan l-intervent, hija ħsieb tal-gvern li nagħmlu xogħol ieħor fuq dan il-proġett. Il-ġebel li intuża fuq dan il-pont hu l-ġebel tal-franka li tqatta mill-mini ta’ taħt l-Imdina.”
Is-Sur Vella qal ukoll kif wara li jitlestew l-interventi mid-Dipartiment tax-Xogħlijiet Pubbliċi u b’hekk il-pont jerġa’ jinfetaħ għall-pubbliku, se jkunu qed isiru interventi oħra mid-dipartiment tar-restawr sabiex tkun ikkonservata l-istruttura li tiddomina l-Wied ta’ Għeriexem.
