Il-passiġġieri li għaddew mill-Ajruport Internazzjonali ta’ Malta f’Ġunju li għadda laħqu l-84 fil-mija ta’ dawk fl-2019, li hija meqjusa l-aqwa sena għat-turiżmu f’pajjiżna.
Dan ħareġ minn statistika maħruġa mill-Ajruport Internazzjonali ta’ Malta, li fiha ntqal li f’Ġunju, mill-istess Ajruport, għaddew 603,532 passiġġier.
ĠUNJU 2022
603,532 PASSIĠĠIER = 84% TA’ ĠUNJU 2019
B’hekk, Ġunju kien l-aktar xahar movimentat għall-mitjar Malti sa minn Ottubru tal-2019.
L-istqarrija tal-Ajruport Internazzjonali ta’ Malta kompliet tinnota li dan ir-riżultat inkiseb flimkien ma’ rkupru ta’ aktar minn tmenin fil-mija (80.8%) fil-movimenti tal-ajruplani u rkupru ta’ 82.3 fil-mija fin-numru ta’ postijiet disponibbli fuq it-titjiriet.
Fil-fatt, għax-xahar ta’ Ġunju ta’ din is-sena, żdied b’1.4 fil-mija n-numru ta’ passiġġieri mgħobbija meta mqabbel Ġunju tal-2019 biex b’hekk inlaħaq livell ta’ 85.5 fil-mija.
Intant l-aktar suq popolari għat-traffiku li għadda mill-Ajruport Internazzjonali ta’ Malta f’Ġunju, baqgħet l-Italja hekk kif is-sehem ta’ dan il-pajjiż saħansitra kiber ftit fuq Mejju tal-2022.
L-AKTAR SUQ POPOLARI: L-ITALJA
Ir-Renju Unit, Franza u l-Ġermanja wkoll żammew posthom mix-xahar ta’ qabel.
Min-naħa l-oħra, hekk kif is-suq Pollakk niżel fis-sitt post, Spanja telgħet fil-ħames post wara nuqqas ta’ seba’ xhur mil-lista tal-aqwa ħamest iswieq tal-ajruport.
L-AKTAR 5 SWIEQ POPOLARI
L-ITALJA
IR-RENJU UNIT
FRANZA
IL-ĠERMANJA
SPANJA
F’Ġunju, l-Ajruport Internazzjonali ta’ Malta laqa’ wkoll l-ewwel titjira tal-linja tal-ajru Vueling minn Bilbao fit-Tramuntana ta’ Spanja, biex b’hekk id-destinazzjonijiet fi Spanja li jistgħu jintlaħqu permezz ta’ titjira diretta minn Malta telgħu għal ħamsa.
L-istqarrija temmet tinnota li t-traffiku sa nofs is-sena fl-2022 kien ilaħħaq kważi t-traffiku kollu għas-sena 2021. Fil-fatt, hekk kif fl-2021 mill-Ajruport Malti għaddew 2.5 miljun passiġġier, bejn Jannar u Ġunju tal-2022 il-passiġġieri li għaddew mill-ajruport laħqu maż-żewġ miljun u tliet mitt elf passiġġier.
2021 = 2.5 MILJUN PASSIĠĠIER
JANNAR – ĠUNJU 2022 = 2.3 MILJUN PASSIĠĠIER
