“Karol u ħuh Robert iwerwu lin-nies mill-Partit Nazzjonalista. L-istil politiku tagħhom idejjaq saħansitra lin-Nazzjonalisti stess u l-uniċi nies li jieħdu gost bihom huma sħabhom l-estremisti, li għandhom lanżita kbira, mhux biss għal-Labour, imma anke għal Nazzjonalisti li mhumiex ta’ ġewwa magħhom”.
Dan sostnewh is-sorsi tagħna mill-qalba tal-Partit Nazzjonalista, wara li baqgħu joħorġu stejjer kif l-aħwa Aquilina, Karol, li llum hu l-Kap de facto tal-Partit, u Robert, li jmexxi l-għaqda Repubblika, komplew juru anke pubblikament li ħadd ma jista’ għalihom fid-Dar Ċentrali.
Dawk li tkellmu ma’ ONE News, bil-kundizzjoni tal-anonimità, tennew li “din il-ġimgħa kellna konferma oħra ta’ kemm Karol u ħuh iffissati biex iqaċċtu l-irjus (politikament) tan-nies li ma jaqblux magħhom.”
Huma kienu qed jirreferu għall-fatt li Robert Aquilina nnifsu qal kif ħuh keċċa lil Ninu Zammit mill-PN, wara li ta ħajtu u saħħtu kollha lill-istess partit, imma lil Austin Gatt ma missewhx, għax dak il-midluk tal-familja Fenech Adami.
Aquilina ddikjara dan fl-intervista li ta fil-podcast ta’ Ricky Caruana waqt li dan irreferih għal eks ministri Nazzjonalisti li nqabdu bi flus mhux iddikjarati barra l-pajjiż.
Kif żvela diġà, ONE News informat li Aquilina kien qed jirreferi speċifikament għal Ninu Zammit li tqaċċat ’il barra mill-PN, fi żmien it-tmexxija ta’ Simon Busuttil, meta Karol Aquilina kien President Amministrattiv tal-PN.
Mhux l-istess kien id-destin ta’ Austin Gatt, li fi żmien GonziPN inqabad li kellu kont bankarju l-Iżvizzera u qal li kien “nesa jiddikjarah”, anke jekk kien ilu miftuħ 40 sena.
Dakinhar Aquilina u Gonzi ma ħadu l-ebda passi kontra Austin Gatt.
L-istess sorsi qalu lil ONE News li “kulħadd jgħid li, sakemm nies bħal Karol (Aquilina) jibqa’ jikkmanda fil-partit, mhemm l-ebda ċans li l-partit jieħu r-ruħ … u n-nies, sakemm idum hemm hu u anke ħuh, jaħarbu qegħdin u mhux jersqu lejna.”
Huma, iżda, tennew li dawn hemm se jibqgħu, għax ħadd mhu se jażżarda jmissu lil Karol. “Warajh hemm Richard Cachia Caruana u min jittanta jieqaf lil Karol (Aquilina) jispiċċa barra mill-partit,” komplew is-sorsi.
Din il-ġimgħa wkoll, il-fazzjoni estremista Nazzjonalista kompliet tiżra’ l-mibegħda fil-konfront tal-partitarji Laburisti, hekk kif Andrew Borg Cardona, magħruf bħala “l-Boċċa” u wieħed mill-perċimes tal-għaqda Repubblika, kiteb fuq il-midja soċjali jistaqsi jekk l-ewtanasja tistax issir mandatorja għal-Laburisti, li sejħilhom ‘Labour trolls’.
