Il-mużiċist u kantawtur lokali Ivan Grech ħareġ diska ġdida bl-isem ta’ ‘(Let’s Get) High on Love’ u tinsab disponibbli fuq il-mezzi tax-xandir minn nhar it-Tnejn 4 ta’ Settembru.
Fl-2019, il-kantant tal-grupp Winter Moods ħareġ l-ewwel diska tiegħu bħala solista ‘Somebody Like You’ segwita minn kunċerti u avvenimenti kbar f’Malta u Għawdex. Din is-sena hu rritorna lura fl-istudio fejn irrekordja t-tieni kanzunetta tiegħu.
‘(Let’s Get) High on Love’ mistennija tikseb l-istess popolarità bħal diversi diski miktubin u interpretati minn Ivan Grech tul il-karriera tiegħu.
Il-kantawtur magħruf qal li “din id-diska nħolqot b’mod kemmxejn differenti mis-soltu. Bdiet minn ħoss elettroniku li ħoloq atmosfera u burdata partikolari u sens ta’ riflessjoni li ispiratni nikteb lirika ta’ għaqda u mħabba f’kull forma tagħha, imżewqa b’melodiji li żgur se jsiru popolari mas-semmiegħa”.
Grech iddeċieda li jġedded in-nostalġija billi uża stil tas-snin tmenin u esplora aktar fil-fond il-mużika ta’ żogħżitu. Ivan Grech ipproduċa din id-diska flimkien ma’ David Vella (il-producer tal-albums ta’ Winter Moods).
‘(Let’s Get) High on Love’ hi parti minn album ġdid li qed jaħdem fuqu Ivan u li mistenni joħrog fl-2024.
