Ivan Grech, il-mużiċist kantawtur magħruf tal-grupp Winter Moods, ser iniedi diska ġdida ‘(Let’s Get) High on Love.’
Din id-diska ser tkun fuq il-mezzi tax-xandir min nhar it-Tnejn 4 ta’ Settembru.
Wara li ħareġ l-ewwel kanzunetta tiegħu bħala solista ‘Somebody Like You’ fl-2019 segwita b’sensiela ta kunċerti u avvenimenti kbar madwar Malta u Ghawdex, Ivan irritorna ġewwa l-istudio u rrekordja t-tieni kanzunetta tant mistennija tiegħu, diska oħra li għandha l-ingredjenti kollha biex tiżdied mal-lista ta’ diski popolari li kiteb Ivan tul il-karriera tiegħu.
“Din id-diska nħolqot b’mod kemmxejn differenti mis-soltu.” qal Ivan. “Bdiet minn ħoss elettroniku li ħoloq atmosfera u burdata partikolari u sens ta’ riflessjoni li ispiratni nikteb lirika ta’ għaqda u imħabba f’kull forma tagħha, mżewwqa b’melodiji li żgur ser isiru popolari mas-semmiegħa.”
Il-produzzjoni tad-diska saret f’Temple Studios flimkien ma’ David Vella, li pproduċa l-albums ta’ Winter Moods. It-timbru tal-leħen ta’ Ivan huwa familjari, però f’din il-kanzunetta huwa esplora aktar fil-fond il-mużika ta’ żogħżitu, fejn jinħass l-istil tas-snin tmenin. Stil ta’ mużika li dan l-aħħar qed nisimgħu iktar bħalha.
‘(Let’s Get) High on Love’ tagħmel parti minn proġett akbar li qed jaħdem fuqu Ivan – album ġdid li ser joħrog fl-2024.
