Lanqas l-eqqel tas-sajf ma ta nifs lill-intriċċi, l-illitikar, u l-battibekki fi ħdan il-Partit Nazzjonalista,
Wara li ftit biss ilu d-deputat Nazzjonalista Ivan Bartolo tal-Mosta akkuża lit-tmexxija tal-Partit Nazzjonalista li warrbitu u iżolatu għax ma jaqbilx f’kollox magħha, għal darb’oħra reġa’ akkuża lil Bernard Grech u sħabu li widnejhom magħluqin għall-kritika u li jridu jeħilsu minnu, filwaqt li qabbel lill-PN ma’ borġ ġebel li fuqu ma jinbet xejn.
F’dawk li diversi attivisti tal-PN iddeskrivew bħala botti ċari mmirati lejn it-tmexxija tal-PN fi blogg fuq il-portal tal-aħbarijiet tal-Knisja, Ivan Bartolo qal li “dejjem se ssib min joħroġlok saqajh għall-gambetti. Bnedmin li s-skiet tagħhom jeskludik, jiddemoralizzak, jinsulentak”. Huwa insinwa wkoll li, wara li tkellem fil-pubbliku dwar kif twarrab u kif għal uħud fil-PN “ix-xejn aħjar minnu”, għaddewh b’persuna paranojka.
Minkejja li ma semmiex direttament lill-PN, dawk kollha li jafu lil Bartolo nnutaw li huwa ovvju li qed juża dan il-mezz biex jattakka lill-kbarat u oħrajn fil-PN li qed jagħmlulu ħajtu infern u li qegħdin ikomplu jwarrbuh dejjam aktar. Fakkru f’kif, ftit ilu, spiċċa jitkellem fuq il-Facebook u qal li dak kien l-uniku mezz li kien fadallu biex isemma’ leħnu.
Bartolo kiteb: “Dawn preparati jagħmlu minn kollox, basta jisparixxulek l-idea. Minn natura tal-bniedem, l-ewwel jipprova bis-silenzju, imma min ma jagħrafx is-silenzju tiegħek, aħseb u ara kemm jagħraf xi tkun qed tagħmel, tħoss u tgħid. Tibqa’ tidwi l-kelma “paranojku”. Irnexxielhom idaħħluhielek f’moħħok biex jiskużaw l-imġiba ħażina tagħhom.”
Bħalma ftit ilu kien appella lil dawk in-Nazzjonalisti mdejqin biex ma jċedux u biex lil Bernard Grech u sħabu “[j]ibqgħulhom hemm”, reġa’ għamilha ċara li mhux se jċedilhom: “Fil-verità jkunu rebħu jekk temminhom, tkun saħħaħthom jekk iċċedi. Tinsiex u żomm f’moħħok li bir-raġun jaġixxu hekk. Tinsiex li fil-mument tal-prova, waqt kull tellieqa li tellaqt biż-żwiemel… filwaqt li int ġejt l-ewwel, huma tkaxkru fl-aħħar post.”
Bartolo kiteb li, minkejja li jridu jeħilsu minnu għax ma jbaxxix rasu għal dak kollu li jgħidu, mhux se jaħli ħin magħhom: “Għalhekk ħinek u l-enerġija tiegħek għandhom limitu, u ma tistax taħlihom fuq min dejjem moħħu biex joskurak u jbaxxik. Taħlix ħin ma’ min ma jridx jinbidel, ma’ min ma jridx jisma’, ma’ min komdu li jkun imdawwar bi bnedmin li jbaxxu rashom quddiemhom u li ħadd ma jiqfilhom u jmerihom. Jekk m’għandhomx interess jisimgħuk, aħseb u ara kif jistgħu qatt jixtarru kritika. L-uniku interess fik hu li jeħilsu minnek. Xejn aktar xejn inqas.”
F’allegorija ovvja li fiha kien qed jirreferi għall-PN, Bartolo semma “borġ ġebel li fuqu ma jinbet xejn”. Qal li jiddiżassoċja ruħu minn nies li moħħhom biss biex jaqbduk f’xi waħda, ħalli mbagħad ixandruk. Huwa qal li dawn huma nies bla emozzjonjiet u li fil-verità lanqas biss kapaċi jaħsbu.
Kiteb ukoll li wieħed għandu jkun ippreparat biex, fi kliemu, lil dawn in-nies wieħed jeħdilhom il-muftieħ biex, għada pitgħada, il-“blata xotta … tibda tnixxi ħalib u għasel”.
