F’turija oħra tal-qasma profonda fil-Partit Nazzjonalista, id-deputat tal-Oppożizzjoni Ivan Bartolo tal-Mosta appella lil dawk fil-Partit li qatgħu qalbhom biex ma jitilqux, għax l-affarijiet għad jinbidlu.
Dikjarazzjoni bħal din għandha xamma ta’ kif, bil-mod il-mod, qed taqbad ir-ritmu fost attivisti u partitarji Nazzjonalisti d-diskuzzjoni dwar jekk wasalx iż-żmien li, bħalma sar fil-każ ta’ Adrian Delia, hekk ukoll jitneħħa minn postu l-kap attwali Bernard Grech.
Ivan Bartolo kien qed jitkellem waqt l-aħħar waħda minn sensiela ta’ laqgħat li qed jorganizza regolarment l-eks deputat tal-PN Edwin Vassallo. Qablu, fil-ġimgħat li għaddew, kienu mistiedna u tkellmu wkoll Alex Borg u Adrian Delia, iż-żewġ deputati Nazzjonalisti l-oħrajn li, dwar l-emendi fil-liġi tal-IVF, fil-Parlament injoraw il-linja tal-whip tal-Oppożizzjoni.
Huwa qal, “Ħafna minnkom jgħiduli, ‘Jiena qtajt qalbi. Jien se nitlaq. Jien mort tajthom it-tessera.’ Le, dan huwa żball. Hemmhekk qed tagħżlu the easy way out. Le, ibqgħulhom hemm, għaliex id-dinja ddur.”
Id-Deputat Nazzjonalista Ivan Bartolo akkuża lill-Partit Nazzjonalista qed jarmi l-prinċipji tiegħu fi sforz biex jipprova jintgħoġob ma’ kulħadd iżda, minkejja dan, l-istħarriġiet tal-fehma pubblika qed juru li, minflok qed jaqbad aktar ħut fix-xibka, il-ħut li diġà hemm fix-xibka tal-partit qed jaħrab.
Bartolo qal, “Ixtri karavan u dur mal-kosta ta’ Malta u oqgħod bigħ il-ġelati. Hemmhekk tinħabb ma’ kulħadd, mela tidħol fil-politika?”
Ivan Bartolo qal li xi ħadd – li ma semmiehx b’ismu – wissieh biex ma jmurx jitkellem fil-laqgħa ta’ Edwin Vassallo għax jitlef jista’.
Huwa spjega, “Il-ħabib tiegħi, l-Onorevoli Adrian Delia, itteggjani (fuq il-Facebook). Ċempilli xi ħadd, qalli: ‘Inti mhux sejjer il-laqgħa ta’ Edwin, hux?’ ‘Mela x’hemm fil-laqgħa ta’ Edwin?’ għidtlu. ‘Oqgħod attent, għax titlef tista’ hawnhekk.”
B’referenza ċara għall-fatt li, anki kif inkiteb fil-midja soċjali, Bernard Grech lil Bartolo għalaqlu kull opportunità li jitkellem fil-midja tal-partit wara li ma vvutax miegħu fil-Parlament, Ivan Bartolo rringrazzja lil Edwin Vassallo talli tah l-opportunità biex jesprimi l-fehmiet tiegħu.
F’botta qal, “Grazzi għax tajtuni pjattaforma fejn inkun nista’ nitkellem. Għaliex meta tieqaf, b’daqqa ta’ pinna jaqtgħuk mid-dinja.”
F’botta oħra lejn Bernard Grech u l-klikka tiegħu, huwa lmenta dwar kif jittattawh bħala wieħed bla utilità għall-PN.
Huwa tenna, “Għax għal xi wħud fil-Partit Nazzjonalista, Ivan Bartolo x-xejn aħjar minnu.”
Nhar is-Sibt li għadda, l-eks Kap tal-PN, Robert Arrigo, ukoll ilmenta li nies qrib it-tnexxija tal-PN warrbuh u qalulu li hu tajjeb biss biex jiġbor il-flus. Bernard Grech mhux biss injora l-uġigħ li esprima Arrigo iżda saħansitra ħareġ igiddbu.
