Pjazza Tritoni tinsab fuq fomm kulħadd b’mod partikolari minħabba r-restawr estensiv li sar fuq il-funtana u l-figuri tat-Tritoni. Iżda ftit iktar minn seba’ snin ilu l-Gvern Nazzjonalista ta’ Lawrence Gonzi u Austin Gatt ried ineħħi l-funtana tat-Tritoni minn fejn hi llum. Dan fi proġett li fost oħrajn riedu jinkludu fih parkeġġ għall-Membri Parlamentari.
Dak iż-żmien id-deċiżjoni ta’ Gonzi u Gatt kienet qajmet furur għaliex nies mis-settur artistiku u kulturali kienu fissru kif din l-iskultura ta’ Vincent Apap kienet simbolu ta’ arti mill-isbaħ li ma kellha qatt tiċċaqlaq minn hemm.
Dak iż-żmien kien spjegat ukoll li Gonzi u Gatt ma kinux jafu x’qed jgħidu jew jagħmlu għaliex kif stajna ninnotaw f’diversi rapporti fl-aħħar ġimgħat il-funtana mhijiex biss l-iskultura iżda hija wkoll is-sistema li hemm taħtha. Fuq kollox il-funtana kienet fi stat fraġli ħafna.
Kelliem għall-Ippjanar dak iż-żmien f’isem il-Partit Laburista kien hemm Roderick Galdes li f’kummenti mal-gazzetta KullĦadd l-għada tal-inawgurazzjoni fakkar li l-ħidma li kien għamel il-Partit Laburista flimkien ma’ oħrajn wasslet biex l-Awtorità għall-Ippjanar, dak iż-żmien il-MEPA, skedat din il-funtana.
Iżda, kien hemm żmien fejn anke l-iskedar kien waqaf, fakkar Galdes, illum Segretarju Parlamentari.
“Dak iż-żmien kont tlabt lill-Gvern ta’ Lawrence Gonzi jispjega min intervjena biex iwaqqaf il-proċess tal-iskedar tal-Funtana tat-Tritoni għall-ogħla livell ta’ protezzjoni. Dan kien intervent dirett fil-MEPA li mbagħad ġie segwit mid-deċiżjoni li din il-funtana titneħħa minn postha biex tagħmel spazju għal parkeġġ. Konna għamilna pressjoni kbira biex fl-aħħar mill-aħħar il-funtana kienet baqgħet hemm u llum konna aħna li tajnieha lura l-glorja tagħha,” spjega Galdes.
Dak iż-żmien, il-Gvern kien irreaġixxa bi stqarrijiet konfrontattivi għad-diskors tal-Oppożizzjoni. Iżda, ma kinetx biss l-Oppożizzjoni li kienet qed titkellem b’mod iebes għal din il-mossa.
Robert Cassar, li kien kuratur ta’ mużew ewlieni fil-Belt Vallletta, kien qal, fl-2011: “Apap kien ikun offiż li kieku jkun jaf b’dan kollu. Niftakru jgħidli kemm kien imweġġa’ meta l-funtana saritilha ħsara għax intużat ħażin. Ma nkunx irrid ngħidlu x’se jiġri issa.”
Iżda, illum żgur li Apap kien ikun kuntent bl-investiment u x-xogħol li sar bin-neputija tiegħu tikteb fuq Instagram tal-Prim Ministru u tgħid: “In-nannu kien ikun kburi. Prosit Kavallier Vincent Apap. Issa tista’ tistrieħ. Il-funtana tiegħek restawrata għall-glojra kollha tagħha.”
