Erbgħa u ħamsin ġurnata biss mill-ġurament tal-ħatra wara l-Elezzjoni Ġenerali tal-2008, il-Prim Ministru Lawrence Gonzi u l-Ministri tal-Kabinett tiegħu taw minn wara dahar kulħadd żieda ta’ aktar minn ħamest elef ewro fil-ġimgħa lilhom infushom.
Kien it-Tnejn 5 ta’ Mejju tal-2008, meta l-Kabinett qabel li, mal-paga tagħhom, għandhom jibdew jitħallsu wkoll l-onorarja.
Fl-istess ħin, il-Kabinett ta’ GonziPN kien qabel ukoll li ssir reviżjoni fl-onorarja biex tiżdied minn €19,000 għal €26,700 fis-sena.
Fil-waqt li ż-żieda fl-onorarja ġiet fis-seħħ minnufih għall-membri tal-Kabinett, ma ġietx fis-seħħ għall-membri Parlamentari l-oħrajn.
Dawn iż-żidiet kien daħlu fis-seħħ fl-istess ħin li l-Gvern ta’ Lawrence Gonzi mar lura mill-akbar wegħda elettorali li għamel, dik tat-tnaqqis tat-taxxa tad-dħul, waqt li mbagħad żied b’mod rekord il-kontijiet tad-dawl u l-ilma fuq il-familji u n-negozji.
Kien biss sentejn u nofs wara, lejn tmiem l-2010, li l-Gvern Nazzjonalista kien kostrett jiżvela l-informazzjoni kollha dwar dawn iż-żidiet meta nqabad fi tweġibiet għal mistoqsijiet Parlamentari min-naħa tal-Oppożizzjoni Laburista.
Wara pressjoni kbira, anke mill-opinjoni pubblika, Gonzi kien qal li ż-żidiet li l-Ministri Nazzjonalisti taw lilhom infushom bil-moħbi, kienu żball.
Fl-istess ħin kienet ingħatat l-impressjoni li dawn iż-żidiet kienu se jintraddu lura kollha. Jirriżulta, iżda, li dan qatt ma seħħ.
Għax, fil-fatt, minn żieda totali ta’ miljun u seba’ mitt elf ewro, li taw lilhom infushom, ċifri uffiċjali juru li Gonzi u l-Ministri tiegħu taw lura biss tlett mitt elf ewro.
Tagħrif li kien ħareġ minn mistoqsija parlamentari juri li l-Kabinett Nazzjonalista kien żamm għandu mal-miljun u erba’ mitt elf ewro.
Tlieta mill-eks Ministri ta’ dak iż-żmien li baqgħu qatt ma raddew lura ż-żieda kollha li ħadu u llum għadhom Shadow Ministers fil-Grupp Parlamentari ta’ Bernard Grech.
Fil-programm Sibt il-Punt, is-Sibt li għadda, il-Kap Eżekuttiv tal-Partit Laburista Leonid McKay żvela l-ismijiet ta’ dawn it-tliet deputati Nazzjonalisti li kienu fil-Kabinett ta’ Gonzi u llum għadhom jifformaw parti mill-Grupp Parlamentari ta’ Bernard Grech.
“Li forsi n-nies hemm barra għadhom ma fehmux, għax kien mingħalihom li dawn ġew irritornati kollha lura, li dawk il-flus qatt ma ġew irritornati kollha lura… Ħa ngħid għalfejn illum hu importanti li nitkellmu dwarha din, għax tliet persuni għadhom fil-Grupp Parlamentari tal-PN, huma Shadow Ministers, li huma Carm Mifsud Bonnici, Chris Said u Mario De Marco. Huma qatt ma rritornaw dawn il-flus. Jekk hemm standards, japplikaw għal kulħadd l-istess, ma japplikawx għal grupp, għal naħa, imma japplikaw għal kulħadd.”
Leonid Mckay, Kap Eżekuttiv,m PL
Minkejja l-ħafna paroli dwar governanza tajba minn kemm ilu Kap tal-Partit Nazzjonalista, Bernard Grech qatt ma talab lil dawn it-tliet Shadow Ministers tiegħu biex ikunu ta’ eżempju u jroddu lura ż-żieda kollha li ħadu fuq erba’ snin, bejn l-2008 u l-2012, u li l-eks Prim Ministru Lawrence Gonzi kien sejjaħ bħala żball u li kien insensittiv.
