Fl-unika partita li kellna l-Ħadd filgħodu fic-Centenary Stadium, Santa Lucia kisbu tlett punti prezzjużi f’rebħa ta’ 2-1 kontra Birkirkara biex b’hekk ir-reġistraw it-tieni rebħa konsekutiva.
Tmien minuti logħob u waslet l-ewwel azzjoni tal-logħba fejn kienu Birkirkara li resqu viċin li jiftħu l-iskor meta minn azzjoni ta’ corner mogħti minn Andrea Zammit, li llum kien qed jagħmel d-debut tiegħu ma l-Stripes, l-ballun wasal għand Maxuell Maia li ra’ l-konkluzzjoni bir-ras tiegħu tiġi mdawwra f’corner ieħor.
Fl-azzjoni sussegwenti fil-21 minuta kienu Santa Lucia li fetħu l-iskor meta kien Santiago Moracci li provda kross lill-Tatsuro Nagamatsu li kkontrolla l-ballun tajjeb u wara żball fid-difiża Karkariża huwa avvanza u mit-tarf tal-kaxxa żgħira għeleb lill-goalkeeper Zaptowski, bil-ballun jispiċċa fix-xibka.
Pronta kienet ir-reazzjoni ta’ Birkirkara u tlett minuti biss wara huma għamlu l-iskor indaqs meta wara azzjoni ta’ kross, kien Andrei Ciolacu li mattar siequ u tefa’ l-ballun fix-xibka biex għamel l-iskor 1-1.
Santa Lucia reġgħu marru fil-vantaġġ fil- 41 minuta b’xutt b’saħħtu ta’ Alessio Piazza li ħabat mal-minduda qabel spiċċa fix-xibka għal 2-1.
Żewġ minuti wara u mill-ġdid kienu Santa Lucia li resqu qrib meta f’azzjoni ta’ kontra attakk kien Pinto Gomez li għadda ballun lejn Santiago Moracci, b’dan ta’ l-aħħar jixxutja żda l-ballun mar barra.
Ħames minuti mil-ftuħ tat-tieni taqsima u freekick għal lis-stripes ta’ Maxuell Maia li għadda barra.
Żewġ minuti wara u mill-ġdid kienu Birkirkara permezz ta’ Andrea Zammit li wara li kkontrolla, dar tajjeb mad-difiża bil-ballun kellhu x-xutt tiegħu mdawwar f’corner.
Birkirkara resqu viċin li jagħmlu l-iskor indaqs fil-81 minuta minn xutt ta’ Encrico Pepe, biex minuta biss wara kien Enmy Manuel Pene Beltre li wkoll prova xutt mid-distanza li spiċċa barra.
Fl-aħħar mumenti tal-partita kienu Birikirkara li reġgħu provaw jiksbu l-goal ta’ draw meta kien Enrico Pepe li kellhu konkluzzjoni bir-ras li kienet salvata mill-goalkeeper ta’ Santa Lucia Francisco Celio Da Paz.
Referee: Andrea Schriha
BOV Plejer tal-logħba : – Francisco Celio Da Paz (Santa Lucia)
