- Il-Gvern mhux biss huwa konxju bl-isfida tas-suq tal-kera iżda s-soluzzjonijiet li se joħroġ bihom mhux se jkunu soluzzjonijiet ta’ issa biss
Il-Gvern mhux biss huwa konxju bl-isfida tas-suq tal-kera iżda s-soluzzjonijiet li se joħroġ bihom mhux se jkunu soluzzjonijiet ta’ issa biss.
Stqarr dan il-Prim Ministru u Mexxej tal-Partit Laburista Joseph Muscat waqt li kien qed jindirizza l-Konferenza Nazzjonali dwar is-Suq tal-Kera fiċ-Ċentru Nazzjonali Laburista l-Ħamrun bħala parti mill-Konferenza Ġenerali Annwali 2017.
Il-Prim Ministru saħaq li hemm bżonn ta’ aktar fiduċja bejn iż-żewġ partijiet, il-kerrej u min jikri u għal dan il-għan hemm bżonn l-intervent tal-Gvern mhux biss jikkmanda l-prezzijiet iżda biex joħloq l-aħjar qafas possibli. Dr Muscat stqarr li l-fatt li qed niddiskutu din il-kwistjoni meta setgħet isir konferenza dwar ix-xogħol u fuq il-figuri ekonomiċi li huma pożittivi mmens, il-Partit Laburista ħass li għandha ssir din il-konferenza fuq din l-isfida li għad iridu naħdmu aktar dwarha. Dwar din l-isfida ssokta jgħid Joseph Muscat qed ikunu mwieżna l-ideat u se jkunu proposti s-soluzzjonijiet. Il-politiċi m’għandhomx jinjoraw problemi ta’ sezzjoni tan-nies sempliċiment għax huma sezzjoni ta’ nies biss saħaq il-Mexxej tal-Partit Laburista.
Dr Muscat stqarr li hemm bżonn isir stħarriġ dwar jekk il-fatt li hawn aktar nies li qed jikru hux qed isir minħabba limitazzjoni ekonomika jew sforz bidla kulturali. Fuq dan il-punt il-Mexxej Laburista aċċenna għall-fatt li jekk ikun hemm inqas nies li huma home-owners fil-futur jaf ikun hemm problema f’dawk li huma pensjonijiet.
Irid ikun hemm aktar inċentivi biex dak li jkun jixtri daru u fuq dan il-punt wasalna biex inħabbru skema li ngħinu lil min ma jasalx fid-depożitu sostna l-Prim Ministru. Joseph Muscat tkellem ukoll fuq il-housing u tenna li l-mizuri tal-housing qegħdin hemm għan-nies foqra, li ma jistgħux jaħdmu u li dawk li huma neqsin mir-riżorsi. Ma naqbilx fuq id-dritt divin li xi ħadd ikollu post iżda għandu jkun hemm il-prijoritajiet u għandu jkun eżaminat il-fatt jekk post tal-Gvern jistax jingħata b’kera sakemm xi ħadd ikun fuq saqajh, spjega l-Mexxej tal-Partit Laburista filwaqt li stqarr kif dan il-Gvern irid jindirizza wkoll dawk li la huma sinjuri u lanqas foqra u fakkar kif dan il-Gvern irdoppja s-sussidju u n-nies li jirċievu s-sussidju.
Fl-aħħarnett il-Prim Ministru qal li għandna neżaminaw il-possibiltà li kull kirja jkollha kuntratt għax jekk ma jkunx hemm la s-sid u lanqas l-inkwilin ma jkunx prottet, temm jgħid Joseph Muscat.
F’din il-konferenza taw is-sehem tagħhom Dr Philip Von Brokdorff, Maria Camilleri, il-Ministru Michael Farrugia, Sandro Chetcuti u Charles Miceli.
