Għal snin twal, speċjalment meta saru kampanji fl-iskejjel dwar kif it-tfal għandhom ifittxu l-għajnuna tal-179, mhux darba u tnejn li ġenituri setgħu jikkummentaw dwar kemm jista’ jkun li uliedhom qegħdin jingħataw arja żejda.
Iżda, kelliema għall-Fondazzjoni għall-Ħarsien Soċjali (FSWS) qalet mal-gazzetta KullĦadd li persuni taħt it-18-il sena huma fost l-inqas li jużaw is-servizz ta’ għajnuna li joffri dan in-numru li issa daħal fil-25 sena tiegħu.
“Għal kontra ta’ dik li hija l-perċezzjoni tal-pubbliku inġenerali, ma tantx iċemplu minuri. Peress li aħna membri wkoll tal-organizzazjoni dinjija, Child HelpLine International, nixtiequ ħafna li tfal u żgħażagħ li għaddejjin minn sitwazzjonijiet diffiċli ma jiddejqux li jċemplu fuq il-linja tagħna. Is-Supportline 179 mhux qiegħed hemm biex jagħti arja żejda lit-tfal iżda huwa mezz ta’ kif tfal li għaddejjin minn sitwazzjonijiet diffiċli jistgħu jfittxu l-għajnuna,” qalet il-kelliema tal-fondazzjoni.
Jirriżulta li l-medja ta’ telefonati kuljum hija ta’ madwar 35. “Ikun hemm telefonati li jieħdu ammont ta’ ħin, ġieli anke siegħa, minħabba n-natura sensittiva tal-problema li min iċempel ikun qed jitkellem dwarha,” kompla jkun spjegat, filwaqt li kien irrimarkat li m’hemmx xejriet li huma l-istess dwar meta jidħlu l-iktar telefonati u dwar xiex.
“M’hemmx pattern ta’ meta u xħin ikun hemm l-aktar telefonati. Ikun hemm ġranet fejn it-telefown ma jiqafx iċempel u jkun hemm ħinijiet fejn inkunu aktar kwieti. Ikun hemm perjodi fejn ninnutaw li qed iċemplu persuni bi problemi simili bħal pereżempju: persuni bi problema ta’ solitudni jċemplu aktar fil-perjodu tal-Milied, nisa tad-dar iċemplu aktar f’ħinijiet ta’ filgħodu fejn forsi jkunu weħidhom id-dar u jkunu jixtiequ jitkellmu rigward xi problema li għaddejjin minnha, matul il-perjodu skolastiku (Ottubru-Ġunju) jkun hemm aktar telefonati ta’ ġenituri li inkwetati fuq il-bullying eċċ…” qalet il-kelliema tal-Appoġġ.
Fuq kollox dan hu servizz li jwieġeb għal kull tip ta’ diffikultà, fosthom telefonati ta’ persuni li għandhom problema ta’ solitudni, persuni li għandhom problemi ta’ saħħa fiżika u/jew mentali, persuni li għaddejjin minn dipressjoni u persuni li għandhom problema ta’ vizzji fosthom droga, alkoħol u logħob tal-azzard. Dan iwassal biex il-kelliema tal-fondazzjoni tgħid li ma tistax tidentifika karatteristika partikolari ta’ min iċempel. “L-unika ħaġa li jkollhom komuni hija li f’mumenti fejn il-persuna tħossha vulnerabbli ssib kenn u gwida fis-Supportline 179,” kien spjegat mal-gazzetta KullĦadd.
Sfidi tal-lum u tal-bieraħ
Jeżistu sfidi li nistgħu nsejħulhom tal-lum u oħrajn li ilhom jeżistu minn dejjem, bħal dik tas-solitudni. Għalkemm ngħixu f’dinja mimlija mezzi ta’ komunikazzjoni u attivitajiet kontinwi jidher li din tal-aħħar xorta waħda qiegħda tiżdied.
“Ikun hemm ħafna dwejjaq bil-problema tas-solitudni, b’mod partikolari anzjani u persuni bi problemi ta’ saħħa mentali. F’dawn il-każijiet il-persuna li ċċempel tkun tixtieq kuntatt uman ta’ persuna li taf tisma’ mingħajr ma tiġġudika, li toffri sapport lil qalb muġugħa, li m’għandhiex ma’ min titkellem u li tħoss li ħadd ma jifhimha. Is-Supportline 179 tħeġġeġ ukoll lil dawk il-persuni li jċemplu b’mod regolari minħabba problema ta’ solitudni sabiex jissieħbu f’xi gruppi jew għaqdiet sabiex ma jiġux dipendenti fuq il-linja ta’ Supportline 179 iżda wkoll jibnu relazzjonijiet ma’ persuni oħra,” qalet il-kelliema tal-Fondazzjoni li spjegat kif l-internet u l-midja soċjali offrew sfida ġdida f’dawn l-aħħar snin.
“It-teknoloġija, b’mod partikolari l-użu tal-internet u l-midja soċjali, ippreżentaw qasam ġdid f’dawn l-aħħar snin li bosta persuni jċemplu dwar problemi relatati, speċjalment mas-sigurtà u l-abbuż fuq l-internet. Dawn it-telefonati jiġu mbagħad referuti għal aktar għajnuna lis-Servizz tal-Hotline fi ħdan l-istess Aġenzija Appoġġ. Fost dawn it-telefonati nistgħu nsemmu problemi bħal cyberbullying, sexting u grooming,” kien irrimarkat.
Meta l-abbuż ikun wieħed serju jridu jittieħdu passi anke jekk in-numru jiggarantixxi ċerta anonimità.
“Il-persuni li jċemplu biex jirrapurtaw abbuż ta’ tfal jew anzjani għandhom dritt li jibqgħu anonimi. Għalkemm ir-rapport ikun anonimu aħna xorta obbligati li ngħadduh lis-servizzi kkonċernati sabiex tittieħed azzjoni u tibda investigazzjoni jekk ir-rapport huwiex minnu jew le. Il-ħaddiema soċjali li jinvestigaw dawn ir-rapporti għandhom it-taħriġ kollu neċessarju sabiex jagħmlu assessjar tajjeb tas-sitwazzjoni u minn hemm jindunaw jekk ir-rapport li sar ikunx wieħed ġenwin jew le,” żiedet il-kelliema tal-Fondazzjoni li fakkret kif il-volontiera kollha fuq in-numru jieħdu taħriġ neċċessarju.
“Il-pjanijiet għal Supportline 179 hu li jibqa’ jħarreġ voluntiera sabiex jassistu lil nies li jkollhom bżonn l-għajnuna u jagħmlu użu minn dan is-servizz. B’hekk l-għan tas-Supportline 179, li jkun is-servizz inizjali biex persuna tfittex l-għajnuna, jibqa’ jintlaħaq. Huwa l-għan tal-Fondazzjoni li s-Supportline 179 ikompli jissaħħah u jikber anke bl-inkluzjoni ta’ aktar ħaddiema professjonali li jassistu lil voluntiera sabiex in-numru ta’ nies li jirċievu dan is-servizz ikompli jikber,” qalet il-kelliema tal-fondazzjoni li meta mitluba tikkummenta dwar telefonati foloz kellha tweġiba pożittiva.
“Ma tantx ikollna minn dan it-tip ta’ telefonati. Il-pubbliku huwa matur f’dan il-qasam. Li jkollna ħafna drabi jkunu żbalji ġenwini.”
