Nhar Ħadd il-Għid, il-kunċert annwali ta’ TOI TOI – il-Programm għat-Tagħlim tat-Teatru Manoel – se jerħilha għal vjaġġ divertenti tul l-istorja tal-mużika pop.
It-TOI TOI Annual Easter Concert jirritorna fit-Teatru Manoel fid-9 ta’ April fil-5pm, b’wirja festiva li se tagħti gost lill-familja kollha.
Il-kunċert tal-Għid ta’ din is-sena, organizzat minn TOI TOI f’kollaborazzjoni mad-Dipartiment Kontemporanju tal-Iskola tal-Mużika ta’ Malta, għal darb’oħra se jsir bis-sehem ta’ artisti żgħażagħ ta’ talent minn madwar Malta u Għawdex, li se jagħtu wirja artistika fuq il-palk ewlieni tat-teatru storiku nazzjonali. Ilkoll flimkien ħolqu spettaklu memorabbli li se jieħu lill-udjenza fuq vjaġġ eċitanti tul l-istorja tal-mużika pop.
Miżgħud b’suċċessi mis-snin ħamsin sal-lum, il-programm mimli daqs bajda tal-Għid jinkludi kanzunetti li ma jmutu qatt u medleys li jħalltu ġeneri mużikali popolari, minn rock ‘n’ roll retro sa Harry Styles.
Nanniet, ommijiet, missirijiet, carers u tfal… hemm xi ħaġa għal kulħadd f’din il-wirja spettakolari tal-Għid li tilqa’ l-familji bi ħġarha – sew għaż-żgħar fl-età u sew għaż-żgħar fl-ispirtu.
It-TOI TOI Annual Easter Concert huwa l-aktar avveniment riċenti ta’ TOI TOI. Il-missjoni ta’ TOI TOI hi li jeduka kif ukoll jiddeverti, waqt li jħeġġeġ l-inklussività u l-innovazzjoni. Dan il-Programm joffri opportunitajiet ta’ wirjiet tal-ispettaklu kif ukoll benefiċċji edukattivi, tekniċi, u artistiċi għall-artisti lokali, filwaqt li jipproduċi firxa vibranti ta’ spettakli u esperjenzi mmirati lejn udjenzi ta’ kull età.
