It-28 edizzjoni tal-Gladiators Fight Night, organizzata minn Gladiators Promotions, fil-Hilton Hotel Malta fit-3 ta’ Ġunju, kien spettaklu ieħor ta’ ġlied mill-aqwa f’diversi dixxiplini bħal Kickboxing, K1, Boxing, u Muay Thai. Tali success kien grazzi għall-wirjiet u prestazzjoniet mill-aqwa ta’ 36 atleta kemm Maltin kif ukoll barranin minn diversi klabbs lokali kif ukoll minn barra minn Malta.
Taħt id-direzzjoni tal-federazzjonijiet internazzjonali WKN u WBC fil-kickboxing u l-Muay Thai, rispettivament, u taħt is-superviżjoni tal-MKBA u l-MBA, total ta’ 19-il ġlieda ġew organizzati, inklużi żewġ ġlidiet waħda għaċ-ċinturin fil-kickboxing WKN Europen PRO/AM championship kif ukoll għaċ-ċinturin WBC Amateur Muay Thai Mediterranean Super Welterweight title. Din tal-aħħar kienet l-ewwel darba li saret fil-gżira Maltija.
L-udjenza li attendiet għal dan l-avveniment kellha l-opportunità li tkun xhieda ta’ ġlied mill-isbaħ bejn ġellieda varji Maltin u oħrajn internazzjonali mill-Italja, l-Greċja, u Spanja fuq livell ta’ “amateurs” u “semi-pro”. Fost dawn il-ġellieda pparteċipa wkoll il-ġellied promettenti malti Brent Spiteri mill-klabb tal-kickboxing Team Noel taħt il-gwida ta’ Master Noel Mercieca. Bi prestazzjoni eċċellenti kontra l-gellied Pieniakowski mill-Polonja, Brent rebaħ iċ-ċinturin għat-titlu WKN Europen
PRO/AM championship fil-kickboxing, b’knockout wara biss 1 minuta w 8 sekondi mill-ewwel rawnd
ta’ 4 x 2 bout.
Fi ġlieda oħra eċċitanti, il-boxer Malti Jeanclaude Mifsud mill-Vikings Boxing Club immexxi mill-kowċ Jos Mark Bonello, irnexxielu jegħleb lill-boxer Joey Fernandez mill-klabb Spanjol Team 69 Monos b’knockout.
F’konfront ieħor li temm l-avveniment, il-ġellied rinomat Malti Jesred Piscopo ġġieled għat-titlu ta’ WBC Ameture Muay Thai Mediterranean Super Welterweight kontra Cosimo Rigovacca mill-Italja, bi ġlieda impekkabbli ta’ 5 x 2 rounds. Bi wirja mill-aqwa miż-żewġ ġellieda ra lit-taljan Cosimo Rigovacca jirbaħ bil-punti.
F’kumment qasir minn Master Noel Mercieca esprima s-sodisfazzjon tiegħu għall-ġellied Malti Brent Spiteri għar-rebħ ta’ dan it-titlu tant prestiġjuż, kif ukoll għas-suċċessi sinifikanti ta’ rebħiet millġellieda Maltin, kemm fi ħdan il-klabb Team Noel kif ukoll mill-klabbs l-oħra Maltin.
Bħala konklużjoni, Gladiators Promotion esprimew il-gratitudni tagħhom lejn l-kowċis kollha għad-dedikazzjoni tagħhom biex iħarrġu lill-ġellieda kollha f’livell daqshekk għoli, kif ukoll lill-judges, referees, voluntiera, sponsors, u fuq kollox lill-pubbliku ġenerali li attenda l-avveniment.
