“Issa rrid nara l-enerġija li kellna fit-tfassil tal-Budget fl-implimentazzjoni tiegħu.”
Hekk saħaq il-Prim Ministru Robert Abela fil-bidu ta’ laqgħa tal-Kabinett fil-Berġa ta’ Kastilja.
F’filmat ippubblikat, il-Prim Ministru sostna li l-Budget li ressaq il-Gvern ilbieraħ kien wieħed ta’ tama u li jagħti direzzjoni ċara li nkomplu mmexxu l-pajjiż ’il quddiem.
Huwa rringrazzja lill-membri kollha tal-Kabinett li taw kontribut b’saħħtu fl-abbozzar tal-Budget u issa dik l-enerġija li ħarġet fit-tfassil tal-Budget trid tkun riflessa fl-implimentazzjoni tal-miżuri fil-Budget.
Miżuri soċjali fosthom li jagħti l-akbar żidiet fl-istorja fil-pensjonijiet u fiċ-children’s allowance, sal-akbar sostenn għall-familji b’żieda addizzjoni għall-għoli tal-ħajja, għal investiment ambjentali u aktar għajnuniet lin-negozji.
Dr Abela nnota li r-rata ta’ implimentazzjoni tal-Budget 2023 kienet b’saħħitha u li għal Budget 2024, il-Gvern irid ikompli jibni fuq dik ir-rata b’saħħitha.
Il-Prim Ministru qal li l-Budget hu pedament b’saħħtu għat-twettiq tal-wegħdiet mill-manifest ‘Malta Flimkien’ hekk kif irrimarka li jinsab sodisfatt li l-elf proposta qed jieħu s-sura ta’ elf kisba għal pajjiżna.
“Is-sigriet tal-Budget kien li waqt it-tfassil tiegħu nżilna man-nies, fost in-negozji, fil-pjazzez u fil-postijiet tax-xogħol”, qal il-Prim Ministru hekk kif aċċenna li dan l-istess stil irid jinżamm fl-implimentazzjoni tal-miżuri li fihom l-aspettattivi tan-nies waqt il-konsultazzjoni magħhom.
