Sigħat qabel il-funeral tal-Professur Oliver Friggieri, li se jingħata l-aħħar tislima f’funeral organizzat mill-Istat Malti, ir-Rettur tal-Università ta’ Malta l-Professur Alfred Vella ddeskrivih bħala akkademju eżemplari.
Ma’ ONE News, ir-Rettur tal-Università qal li l-Professur Friggieri kien jaqdi lill-istudenti bit-tagħlim tiegħu, kien jaqdi lill-għerf billi jipproduċi materjal ta’ valur u riċerka, u kien jaqdi lis-soċjetà għax kien jikkomunika magħha direttament bil-kitbiet tiegħu.
“Jagħmel l-affarijiet kollha b’manjiera ideali li għandha tispira lil kulħadd fl-akkademja”, qal il-Professur Vella dwar Friggieri.
Intant, il-Korteo se jgħaddi mal-Kampus tal-Università u jieqaf viċin il-Fakultà fejn kien jaħdem.
Mat-triq se jkun hemm ħaddiema u studenti tal-Università li se jsellmu l-memorja tiegħu, fejn imbagħad se jieqaf f’post partikolari fejn se titpoġġa girlanda fuq it-tebut u titkanta poeżija tiegħu mal-mużika ta’ Vince Fabri.
“Salut żgħir imma sinifikanti għal persuna li tant għamel ġid kemm mal-istudenti, għall-Università nnifisha u anki fuq livell nazzjonali”, temm il-Professur Vella.
One.com.mt se jxandar b’mod dirett is-servizz funebri li se jkun organizzat mill-Istat b’tislima lill-Prof. Friggieri.
