F’intervista fuq One il-Ħadd filgħodu, il-Prim Ministru u Mexxej Laburista Robert Abela saħaq li s-suċċess li qed jikseb pajjiżna fil-ġlieda kontra l-Covid-19 ma’ ġiex b’kumbinazzjoni.
B’reazzjoni għall-aħbarijiet pożittivi, li jixhdu l-kontroll mill-Awtoritajiet b’rabta mat-tixrid ta’ din l-imxija, il-Prim Ministru qal li l-pajjiż kien preparat minn kull aspett.
Il-Prim Ministru stqarr, “Ma ġarax b’kumbinazzjoni dan is-suċċess. Is-suċċess ġara għaliex konnha preparati. Konnha preparati fuq livell mediku. Konnha preparati fuq livell ekonomiku u ma stennejniex il-pandemija tasal fi xtutna umbagħad ngħidu imma x’se nagħmlu?”
Il-Prim Ministru Abela spjega kif dan il-Gvern fehem dak kollu li kien qed jiġri f’pajjiżi oħra u prepara ruħu minn qabel sabiex ikun imħejji għall-agħar li jista’ jinqala’.
Ta mertu wkoll id-deċiżjonijiet tajbin li ħa l-Gvern. Fosthom li ma jagħmilx ristrezzjonijiet ristrettivi żżejjed.
Dr Abela kompla jgħid, “Immaġina kieku għamilna lockdown totali. Ilna xhur f’dan il-lockdown u kien ikollna l-istess livell ta’ suċċess u forsi kien ikollna inqas livell ta’ suċċess minn aspett mediku milli kellna bil-miżuri gradwali, prudenti li għamilna aħna.”
Il-Prim Ministru faħħar ukoll il-programm għaċ-Ċittadinanza b’investiment hekk kif spjega li kien strumentali sabiex jiġu salvati mat-tmenin elf impjieg filwaqt li jiġu implimentati l-benefiċċji soċjali li ntroduċa l-Gvern.
Fil-fatt il-Prim Ministru Abela spjega li bdew id-diskussjonijiet mal-Kummissjoni Ewropea sabiex dan il-programm jinżamm. Sostna li l-emendi fih ser jibqgħu jsiru b’mod kostanti, madankollu dan huwa programm li għandu proċess ta’ skrutinju b’saħħtu.
Huwa saħaq, “Tant għandna due-diligence b’saħħtu li ħafna mill-applikazzjonijiet li aħna niċħdu jmorru f’pajjiżi oħrajn u dawn l-applikazzjonijiet jiġu milqugħha.”
Intant waqt l-intervista l-Prim Ministru tkellem dwar l-impenn qawwi ta’ dan il-Gvern fil-qasam tal-governanza t-tajba mindu ħa t-tmun tal-pajjiż.
Spjega kif il-bidla fil-proċess tal-ħatra tal-Kummissarju tal-Pulizija turi l-messaġġ b’saħħtu tal-Gvern favur il-governanza t-tajba.
Stqarr, “Il-bażi ta’ kollox tibqa’ l-governanza t-tajba u għal daqstant b’dan il-proċess ġdid ta’ ħatra ta’ Kummissarju tal-Pulizija mxejna ma’ dak li rrakkomandat il-Kummissjoni ta’ Venezja anzi morna pass iżjed minn hekk.”
Il-Prim Ministru appella wkoll għal qbil mal-Oppożizzjoni dwar dan il-metodu ta’ ħatra. Dan bħalma kien hemm qbil bla preċedent dwar il-Prim Imħallef Mark Chetcuti, l-qbil dwar il-metodu ta’ ħatra tal-Prim Imħallef ta warajh u l-qbil dwar il-ħatra tal-ġudikatura.
Intant waqt l-intervista tkellem dwar l-ambjent f’pajjiżna, fid-dawl tal-bidliet prinċipali fil-policy il-ġdida tal-pompi tal-petrol.
Bidliet li wkoll qed ikomplu juri l-impenn tal-Gvern favur il-qasam ambjentali.
“Qed nuru darba wara darba wara darba f’temp ta’ ġimgħatejn għamilna l-policy dwar l-immaniġġjar tal-iskart kruċjali għal pajjiżna issa nedejna din il-bidla fil-fuel stations policy u fadal iżjed ukoll jiġifieri m’għamilniex biżżejjed mexjin fit-triq it-tajba, fadal x’nagħmlu u se nibqgħu għaddjein f’din il-ħidma.” Temm jgħid il-Prim Ministru.
