Matul is-sena li ġejja, pajjiżna se jara l-introduzzjoni ta’ teknoloġiji ġodda li għandhom isaħħu sew is-sigurtà fit-toroq, fl-istess waqt li jevitaw iżjed il-kriminalità.
Ġimgħa wara li tħabbar il-baġit għas-sena d-dieħla, il-Ministru Byron Camilleri u s-Segretarju Parlamentari Rebecca Buttigieg indirizzaw konferenza tal-aħbarijiet fejn spjegaw diversi miżuri maħsubin biex jagħmlu lil Malta aktar sigura u ugwali.
Il-Ministru Camilleri semma l-introduzzjoni ta’ kameras f’lokalitajiet strateġiċi, bħal San Ġiljan, San Pawl il-Baħar, il-Marsa u Raħal Ġdid, biex jgħinu lill-uffiċjali tal-LESA fil-ħidma tagħhom.
Semma wkoll il-panic alarms għal vittmi tal-vjolenza domestika u l-introduzzjoni tal-electronic tagging.
“Bl-istess mod li rajna investiment bħal tal-bodycams, li wasslu għal deterrent kbir, l-istess qed nagħmlu din id-darba, f’miżuri speċifiċi, sew jekk hux teknoloġija tal-kameras li tgħin għal deterrent, sew jekk hux fil-panic alarms li tgħin vittmi ta’ vjolenza domestika, u sew jekk hux matul is-sena d-dieħla nippjanaw li jidħol l-electronic tagging, li b’dan il-mod allura huma kollha miżuri teknoloġiċi, imma wkoll li jgħinu ħafna lill-ħaddiema biex ikunu jistgħu jaħdmu fil-qasam tas-sigurtà.”
Meta kien qed jitkellem dwar il-Korp tal-Pulizija, il-Ministru semma rwol ġdid li se jibda jopera s-sena d-dieħla – dak tal-patrol and community support, li se jara uffiċjali jwettqu rondi fl-aktar żoni li joffru sfidi.
Bl-istess mod se tinħoloq skwadra speċjalizzata ġdida tar-Roads Policing, li l-għan ewlieni tagħha hu li tassisti fis-sigurtà fit-toroq f’każi ta’ aċċidenti kbar.
F’kuntest ta’ Gvern, li fl-aħħar snin tejjeb sew il-kundizzjonijiet tal-ħaddiema fil-korpi dixxiplinati kollha, il-Ministru spjega kif bil-baġit għas-sena d-dieħla, għall-ewwel darba, wara friża ta’ ħafna snin, se tingħata l-pensjoni tar-romol lill-ħaddiema tal-korpi dixxiplinati kollha u lir-romol tagħhom, mhux biss dawk li għadhom iservu, imma anke eks ħaddiema.
Sadanittant, is-Segretarju Parlamentari Rebecca Buttigieg spjegat kif kemm il-Baġit ‘Malta Ġusta’ kif ukoll il-manifest elettorali ‘Malta Flimkien’, jaħdmu id f’id biex jagħmlu lil Malta aktar ugwali u ġusta.
Spjegat kif is-sena d-dieħla se jsir investiment bla preċedent biex it-tfajliet fl-iskejjel kollha ta’ pajjiżna jingħataw prodotti menstruwali b’xejn – f’inizjattiva mnebbħa mill-prinċipju tal-ġustizzja soċjali.
“Dan il-Gvern se jinvesti nofs miljun ewro biex nagħtu aċċess ugwali lit-tfajliet kollha li qegħdin fl-iskejjel madwar Malta u Għawdex għal dawn il-prodotti li, fl-aħħar mill-aħħar, huma importanti u essenzjali, mhux kapriċċ. Għaldaqstant qed naħdmu biex mhux biss nipprovduhom b’xejn u jkun hemm aċċess ugwali, iżda jkollna kampanji ta’ edukazzjoni biex ikun hawn aktar għarfien dwar dan il-proċess naturali u nneħħu l-istigma li hemm assoċjata miegħu.”
Is-Segretarju Parlamentari tkellmet ukoll dwar l-impenn tal-Gvern li jkompli jiġġieled il-vjolenza domestika, anke permezz tat-teknoloġija, kontra din il-pjaga soċjali, u semmiet kampanji edukattivi li se jissoktaw matul is-sena li ġejja.
Dwar id-drittijiet ċivili, Buttigieg tenniet l-impenn tal-Gvern li, wara l-organizzazzjoni b’suċċess tal-EuroPride din is-sena, Malta se taħdem biex iżżomm postha fil-quċċata tal-lista tal-pajjiżi bl-aqwa drittijiet ugwali.
Semmiet ukoll l-importanza li tkompli tonqos id-diskrepanza bejn il-pagi skont il-ġeneru u qalet kif din il-ġimgħa stess se titħabbar għodda ġdida li se ssaħħaħ dan.
