Ftit tal-jiem ilu fuq il-mezzi soċjali, fuq il-paġna ta’ Pubity fuq il-pjattaforma Instagram, is-siġra tal-Milied armata fi Pjazza Kastilja fil-Belt Valletta ġiet rikonoxxuta bħala waħda mill-isbaħ siġar tal-Milied armati fid-dinja.
Din is-siġra tal-Milied għamlet il-lista fejn fost oħrajn, hemm siġar tal-Milied minn diversi bliet minn madwar id-dinja, inkluż dawk ta’ Lisbona, Beijing, Madrid, Seoul, Londra, u New York, fost oħrajn.
Is-siġra tal-Milied fi Pjazza Kastilja saret figura importanti f’pajjiżna f’dan iż-żmien ta’ festi, hekk kif din is-siġra tiġbor taħtha numru kbir ta’ rigali biex jitqassmu lit-tfal grazzi għall-inizjattiva ‘Rigal b’Imħabba’.
Għaldaqstant, huwa ta’ unur għal pajjiżna li siti tal-midja soċjali internazzjonali qed jirrikonoxxu s-siġra Maltija armata fi Pjazza Kastilja, kemm għas-sbuħija tagħha, kif ukoll għall-figura ta’ ġenerożità li llum il-ġurnata qed iġġorr magħha.
