Il-Fond Monetarju Internazzjonali qed ibassar li s-sena d-dieħla pajjiżna se jkollu l-ogħla rata ta’ tkabbir ekonomiku fiż-Żona Ewro.
F’rapport ta’ tbassir ekonomiku li ħareġ l-IMF għal din is-sena u s-sena d-dieħla, fl-2022, l-Prodott Domestiku Gross ta’ Malta, f’termini reali se jkun ta’ 5.6%.
Din hija l-ogħla rata fost dsatax-il pajjiż fiż-Żona Ewro.
Il-medja fiż-Żona Ewro se tkun ta’ 3.8% biex b’hekk l-ekonomija ta’ pajjiżna se tkun kważi żewġ perċentwal ogħla mill-medja fiż-Żona Ewro.
Pajjiżi bħall-Ġermanja, l-Olanda u l-Belġju għandhom rati ferm inqas baxxi minn Malta.
Pereżempju l-Ġermanja, meqjusa bħala l-mutur ekonomiku tal-Ewropa, ir-rata tal-prodott domestiku gross għas-sena d-dieħla mistennija tkun ta’ 3.8%.
Għal din is-sena, l-esperti tal-IMF qed ibassru li r-rata tal-ekonomija Maltija mistennija tilħaq l-4.7%, 0.3% iżjed mill-medja taż-Żona Ewro.
Fiż-Żona Ewro din is-sena huma biss Spanja u Franza li mistennija jkollhom rata ta’ tkabbir ogħla minn pajjiżna.
Matul is-sena l-oħra dawn iż-żewġ pajjiżi kienu laqtu daqqa ekonomika ferm agħar minn Malta.
Ir-rapport isemmi li pajjiżna mistenni jkompli jesperjenza tnaqqis fil-qgħad u r-rata ta’ dawk li jirreġistraw għax-xogħol f’Malta mistennija li tiżboq iżjed min-nofs il-medja taż-Żona Ewro.
Ir-rapport jinnota wkoll li meta wieħed jikkunsidra l-impatt tal-pandemija, u s-saħħa tal-irkupru ekonomiku sa tmiem l-2022, it-tbassir tal-esperti tal-Fond Monetarju Internazzjonali jimplika li fiż-Żona Ewro l-Prodott Domestiku Gross ser ikun qabeż b’1.5%, il-livell li kien hemm qabel bdiet il-pandemija.
F’pajjiżi bħall-Italja u Spanja xorta l-ġid nazzjonali mistenni jkun għadu anqas milli kien qabel bdiet il-pandemija.
B’kuntrast, f’Malta il-livell tal-Prodott Domestiku Gross mistenni li jkun 2.8% ogħla mill-2019, meta ma kienx hawn pandemija.
Dan huwa l-aħjar riżultat fost pajjiżi Ewropej dipendenti fuq it-turiżmu.
