Is-Segretarju Ġenerali tan-Nazzjonijiet Uniti, Antonio Guterres, faħħar lill-pajjiżna hekk kif waqt il-Presidenza Maltija tal-Kunsill tas-Sigurtà tan-Nazzjonijiet Uniti, Malta għażlet li tiddiskuti t-tibdil fil-klima.
Fil-bini tal-Kunsill tas-Sigurtà tan-Nazzjonijiet Uniti fi New York, matul il-jum tat-Tlieta sar dibattitu bejn bosta pajjiżi dwar it-tibdil fil-klima u ż-żieda fil-livell tal-baħar.
Dan id-dibattitu fi New York tmexxa mill-Ministru għall-Affarijiet Barranin u Ewropej, u l-Kummerċ ta’ Malta, Ian Borg.
Min-naħa tiegħu, is-Segretarju Ġenerali tan-Nazzjonijiet Uniti, Antonio Guterres, qal li dan il-fenomenu klimatiku jista’ jwassal għal aktar faqar, b’miljuni ta’ nies jispiċċaw mingħajr post fejn jgħixu. Dan apparti li dan jista’ jwassal biex jinqerdu l-ekonomija u anki setturi kruċjali bħal dak tal-agrikoltura.
Guterres appella lill-pajjiżi sabiex ikun hemm pjan ta’ azzjoni sabiex flimkien jiġġieldu kontra dan il-fenomenu.
F’isem Malta dwar dan is-suġġett tkellem il-Ministru għall-Affarijiet Barranin u Ewropej u l-Kummerċ, Ian Borg, li sostna li dan is-suġġett irid jiġi indirizzat biex ikun hawn il-paċi u s-sigurtà madwar id-dinja. Dan huwa messaġġ prinċipali li qed twassal Maltamatul il-mandat tagħha fil-Kunsill tas-Sigurtà tan-Nazzjonijiet Uniti.
Il-Ministru Borg qal li t-tibdil fil-klima qiegħed jinħass madwar id-dinja kollha, fosthom fl-gżejjer żgħar. Wissa li, jekk ma tittiħidx azzjoni issa, fl-2060, biljun persuna jispiċċaw ikollhom jiċċaqalqu minn fejn jgħixu.
Fil-Kunsill tas-Sigurtà, il-Ministru Borg qal li jekk mhux se tittieħed azzjoni se naslu għal realta fejn id-dinja tkun differenti immens minn dik li ngħixu fiha bħalissa.
“L-effett ta’ meta jogħla l-baħar u l-oċeani, nantiċipaw li se jkun qed iħalli devastazzjoni kbira. It-tibdil fil-klima se jkun qed jaffettwa b’mod dirett anke għaliex popolazzjonijiet sħaħ jista’ jkun li jitilfu djarhom, l-għajxien tagħhom, u nantiċipaw li jista’ jkollna wkoll popolazzjonijiet u pajjiżi sħaħ li jkollhom jirrilokaw.”
Il-Ministru Borg semma wkoll l-inizjattiva ‘Island for Islands’, li l-Prim Ministru Robert Abela nieda waqt il-COP26 fi Glasgow fir-Renju Unit, sentejn ilu. Permezz ta’ din l-inizjattiva, Malta qed tgħin gżejjer żgħar dwar l-immaniġġjar tal-ilma.
Preżenti għal din l-attività kien hawn ukoll il-ħmistax-il rappreżentant tal-Kunsill tas-Sigurtà tan-Nazzjonijiet Uniti, fosthom dik Maltija, Vanessa Frazier. Kien hemm anki numru ta’ rappreżentanti minn Stati żgħar minn kull rokna tad-dinja.
Aqra dwar l-ewwel attività prinċipali ta’ Malta fil-Presidenza tal-Kunsill tas-Sigurtà tal-Nazzjonijiet Uniti hawn:
