It-Teatru Salesjan u il-Hub għall-Eċċellenza fl-Arti Letterarja, HELA, rebħu l-Premju tal-President għall-Kreattività 2020. Dan jippremja għaqdiet li jew ikunu provdew għajnuna għat-tisħiħ u l-iżvilupp tal-kapaċitajiet fil-kultura fost il-komunitajiet, u li jkunu taw għajnuna għal proġetti jew programmi kulturali fil-komunità.
Dan kollu jkattar l-għarfien dwar id-diversità u jxerred il-prattika tajba fil-kultura u l-inklussività. Iż-żewġ proġetti rebbieħa rċievew €75,000 bejniethom, mifruxin fuq medda ta’ tliet snin.
It-Teatru Salesjan rebaħ il-premju għat-Tisħiħ u Żvilupp tal-Kapaċitajiet grazzi għall-poġett Kordinatriċi tal-ħidma mal-komunitajiet, u HELA rebħet il-premju għall-Iżvilupp ta’ proġetti u programmi għall-inizjattiva Raħal il-Letteratura.
Ir-rebbieħa qalulna, “Permess ta’ dan il-proġett, diġà attwajna proġetti oħra u stajna nwessgħu l-viżjoni tagħna u anke l-opportunitajiet għal persuni differenti fil-komunità.
B’kollaborazzjoni ma’ msieħba oħra, HELA tfittex li tpoġġi l-kotba fiċ-ċentru tar-Rabat u lil hinn. Ħriġna wkoll l-ewwel gazzetta letterarja, qari għat-tfal u għall-kbar, u aktar gazzetti letterarji, naturalment.”
Il-President ta’ Malta George Vella qal li l-qasam kulturali kien fost bosta setturi li ħassew id-daqqa tal-pandemija tal-Covid-19 matul is-sena li għaddiet. L-attivitajiet kulturali bħalissa huma mxekkla minħabba r-restrizzjonijiet imposti mill-Awtoritajiet tas-Saħħa, li jillimitaw bil-qawwi l-parteċipazzjoni tal-pubbliku.
Il-President Vella stqarr: “Dan hu żmien li naħsbu fit-tul biex niġġeddu u noħolqu ideat ġodda. Insibu opportunitajiet ta’ espressjoni kreattiva u għaliex le, insaħħu wkoll l-aċċessibilità u l-inklużjoni permezz tal-kreattività.”
Il-Ministru għall-Arti José Herrera qal li dan il-Premju jagħti għarfien u sostenn speċjali lill-proġetti għat-titjib tal-kwalità tal-ħajja għal kulħadd, permezz tal-kultura u l-arti.
Il-Ministru Herrera sostna: “Se nisskotaw, naġġornaw, u nsaħħu d-djalogu interkulutrali, u r-relazzjonijiet kulturali internazzjonali. fi ftit kliem għandna vjaġġ eċċitanti mhux ħażin quddiemna. Dan hu l-waqt li nieħdu passi kuraġġużi, b’impenn lejn il-ġid sħiħ tal-komunitajiet tagħna.”
Il-Premju tal-President għall-Kreattività tmexxa mill-Uffiċċju tal-President u l-Kunsill Malti għall-Arti.
