Bħalissa l-Meditterran għaddej minn mewġa ta’ temperaturi qawwija li jwasslu għal sħana tremenda. Dan il-fenomenu qed jolqot mhux biss lil Malta imma anki saħansitra ċ-Ċina u l-Istati Uniti Tal-Amerika.
ONE News tkellem mal-Professur Simone Borg li hija l-Ambaxxatriċi għall-Bidla fil-Klima li tlabniha tispjegalna għaliex dawn it-temperaturi għoljin bħalissa vis a vis it-tibdil fil-klima. Hija spjegatilna fid-dettall x’hemm bżonn isir mill-bniedem biex jevita li jkun hemm aktar tibdil il-klima.
Qalet, “Kull bniedem jista jagħmel il-parti żgħira tiegħu u l-gvernijiet imbgħad iridu jieħdu din ir-responsabilità fuqhom. Il-kawża ta’ dan kollu hija l-użu tal-prodotti taż-żejt, il-gass, il-faħam u li aħna nużaw biex niġġenerraw l-enerġija, it-trasport etc. It-Trattat ta’ Pariġi u trattati oħra qablu, jgħidulna waqfu dawn is-sorsi ta’ enerġija u nużaw l-enerġija rinovabbli. Din biss hija s-soluzzjoni u sfortunament minħabba l-ħsara li diġà saret, anki jekk nieħdu kull pass biex nagħmlu din is-soluzzjoni jista jkun malajr xorta se nsofru mill-impatti fil-klima għall ftit tas-snin.”
Tlabniha timraħ ukoll dwar x’qed jagħmel pajjiżna dwar it-tibdil fil-klima.
Stqarret, “Iktar ma nindirizzaw din il-problema malajr iktar ħa jkollna ċans li nevitaw iktar danni. Bħala pajjiż Malta hija minn ta’ quddiem anki bħala membru tal-Unjoni Ewropeja li tiġġilled it-tibdil fil-klima u għandha dawn il-pjanijiet, it-targets biex innaqsu u mmorru għal sorsi ta’ enerġija nodfa.”
L-Ambaxxatriċi għall-bidla fil-klima emfażżizat dwar l-importanza li kulħadd jagħmel il-parti tiegħu.
Qalet, “L-ewwel ħaġa rridu li nobdu l-istruzzjonijiet li qed ningħataw u anki kif naddattaw għal din il-bidla, anki fuq saħħitna, nevitaw ix-xemx etċ. Imma mbagħad naħseb li l-poplu jrid jagħraf ukoll, dan mhux il-Maltin biss, imma d-dinja kollha, illi aħna wkoll irridu nkunu nagħtu s-sapport tagħna. Jekk hemm bżonn ċertu bidliet li rridu nagħmluhom. Jekk għandna kemm jista jkun ma nużawx il-karozza per eżempju u nużaw sistemi pubbliċi. Ma naħlux enerġija, ninvestu fid-djar tagħna inkunu effiċjenti fl-użu tal-enerġija.”
Il-Professur Borg saħqet li d-Dinja trid taġixxi għal din il-problema tat-tibdil fil-klima malajr kemm jista jkun.
Temmet tgħid, “Irridu nkunu kif konnha fil-Covid, nindirizzaw il-ħaġa b’mod drastiku, hekk irridu nkunu għall-bidla fil-klima, daqs hekk hija allarmanti, daqs hekk hija emerġenza.”
