Il-President Russu, Vladimir Putin, mhux biss mhux se jattendi għall-aħħar tislima lill-aħħar mexxej Sovjetiku, Mikahil Gorbachev, talli se jċaħħdu milli jkollu funeral Statali kif kellu, ngħidu aħna, l-ewwel President Russu wara li kkrollat l-Unjoni Sovjetika, Boris Yeltsin.
Il-Kremlin qal li l-iskeda tax-xogħol tal-President mhux se tippermettilu li jkun preżenti.
Il-funeral ta’ Gorbachev, li miet nhar it-Tlieta fl-għomor ta’ 91 sena, se jsir is-Sibt fil-famuża Sala tal-Kolonni fil-Palazz tal-Unjins f’Moska, l-istess lok fejn saru l-funerali ta’ mexxejja Sovjetiċi oħrajn bħal Vladimir Lenin, Josef Stalin, u Leonid Brezhnev.
Gorbachev se jindifen fiċ-ċimiterju ta’ Novodevichy, ħdejn martu Raissa, li għalqet għajnejha fl-1999. F’dan il-midfen hemm ukoll bosta politiċi kbar, intellettwali, poeti, u membri tal-familja rjali. Fosthom hemm Boris Yeltsin, l-ewwel President tar-Russja, li kien ukoll rivali politiku ta’ Gorbachev. L-uniku mexxej Sovjetiku ieħor li ndifen hemmhekk huwa Nikita Kruschev, filwaqt li l-biċċa l-kbira tal-mexxejja Sovjetiċi l-oħrajn huma midfunin fil-Pjazza l-Ħamra ħdejn il-Kremlin.
Nhar l-Erbgħa, Putin ta l-għomor lill-qraba ta’ Gorbchev perezz ta’ telegramma li fiha ddeksrivih bħala persuna li kellha influwenza enormi fuq l-istorja tad-dinja u li pprova jimbotta riformi biex iwettaq bidliet fundamentali fl-Unjoni Sovjetika.
Il-Ħamis, ix-xandir tal-Istat wera lil Putin ipoġġi b’mod solenni ward aħmar maġenb it-tebut ta’ Gorbachev li, skont it-tradizzjoni Russa, tħalla miftuħ fl-isptar fejn miet f’Moska. Huwa radd is-salib u mess ix-xifer tat-tebut.
George Saliba, li kien l-ambaxxatur ta’ Malta għar-Russja bejn l-1993 u l-1997, jiġbed l-attenzjoni għall-fatt li l-mod kif naraw lil Gorbachev fil-Punent mhux kif jarawh f’pajjiżu stess.
Kien bniedem nice ħafna, pero mar-Russi… kif taf inti, ir-Russi ma kienu jħobbuh xejn, għax ir-Russi raw li waqqa’ l-Unjoni Sovjetika u, meta kont hemmekk jien, ħareġ għall-elezzjoni u kulma ġab 0.05 per cent tal-vot, jiġifieri half of one percent biss. Għalkemm mal-Punent kien maħbub u kien imfaħħar, imma mar-Russi qatt ma kien stmat bl-istima li kellu fil-Punent.
Ironikament, l-invażjoni tal-Ukrajna mir-Russja qed tiġi interpretata minn bosta osservaturi politiċi bħala tentattiv minn Putin biex ireġġa’ lura, almenu parzjalment, il-kollass tal-Unjoni Sovjetika li hu jinsisti li Gorbachev ma rnexxilux jipprevjeni fl-1991. L-eks ambaxxatur Saliba jemmen li Gorbachev innifsu kellu biċċa mit-tort għal dak li qed jiġri llum.
Sa ċertu punt, dak li qed jiġri llum fl-Ukrajna nagħti parti minnu tort lil Gorbachev u ħafna tort lill-Punent, għaliex Gorbachev dejjem qal li lilu qalulu “inti żarma l-Warsaw Pact u aħna nżarmaw in-NATO”. Pero, Gorbachev qatt ma talabhielhom, din, bil-miktub. Qatt ħadd ma ċaħadha, la Kohl, la ħadd qatt ma ċaħadha li wegħdulhielu din. Imbagħad, meta bdiet l-espansjoni tan-NATO, ir-Russja kellha tieħu azzjoni li ħadet. Infatti, meta r-Russja għamlet l-annexation tal-Crimea, Gorbachev kien favur.
Ħames snin wara li ħa l-poter fis-sena 2000, Putin kien sejjaħ il-kollass tal-Unjoni Sovjetika bħala l-ikbar katastrofi tas-Seklu 20.
