Tlietin pazjent li ta’ kull sena jintbagħtu barra minn Malta għall-operazzjonijiet tal-prostata ser jibdew jiġu operati f’pajjiżna bis-saħħa ta’ investiment ta’ €4 miljun f’apparat robotiku fl-Isptar Mater Dei.
F’konferenza tal-aħbarijiet fid-day care unit tal-Isptar intqal li dan l-investiment se jnaqqas l-uġigħ tal-pazjent wara l-operazzjoni u l-użu ta’ demm waqt l-operazzjoni. Fl-istess waqt il-pazjent se jqatta’ inqas jiem fl-isptar u se jkun jista’ jkompli bir-rutina iktar malajr.
Il-Kap tad-Dipartiment Dr Gordon Caruana Dingli qal li dan l-apparat state of the art se jibda jitħaddem mis-sena d-dieħla. Huwa spjega: “Idaħħal l-istrumenti ġol-pazjent u ċċaqlaqhom u tagħmel movimenti li jkun qed jagħmel il-kirurgu u dan ir-robot jagħmel il-movimenti ġol-pazjent. Jiġifieri hemm kollox kkontrollat u iktar eżatt milli kieku tagħmlu b’idejk biss.”
Huwa saħansitra spjega kif permezz ta’ din it-teknoloġija pazjent jista’ jiġi operat minn tabib li jkun barra l-pajjiż. “Ikun hemm okkażjonijiet fejn ikun hemm kirurgu speċjalista f’ċertu operazzjoni, jikkontrolla l-magna minn pajjiż wieħed u l-operazzjoniji per eżempju ssir f’pajjiż ieħor jew sptar ieħor”, tenna Dr Caruana Dingli.
Il-kirurgu spjega fl-aħħar ġimgħat kirurgi Maltin tħarrġu barra minn xtutna minn speċjalisti barranin dwar l-użu ta’ dawn ir-robots.
Tkellimna wkoll mal-urologu Dr Gerald Busuttil fejn spjegalna kif dan l-apparat ser jiffaċilitalu xogħlu. Huwa spjega: “Il-movimenti tal-idejn huma iktar fini u preciżi, il-vizibilità u l-aċċess għall-post fejn trid topera huma aħjar u anke jagħtik ċertu vantaġġi bħala tip ta’ strumenti li tista’ tuża, in-numru ta’ strumenti li tista’ tuża fuq key-hole surgery tradizzjonali.”
Id-Deputat Prim Ministru Chris Fearne żied jispjega kif dan l-apparat robotiku ser jintuża għal iktar operazzjonijiet.
“Eventwalment jinfirex fuq operazzjonijiet oħra fuq il-fwied, fuq l-intern, fejn għandhom x’jaqsmu operazzjonijiet tal-widnejn u operazzjonijeit ginikoloġiċi”, sostna d-Deputat Prim Ministru Fearne.
Huwa sostna kif permezz ta’ dan l-investiment, l-isptar Mater Dei qed ikompli jistabbilixxi ruħu bhala wieħed mill-aqwa sptarijiet fl-Ewropa.
Fil-fatt spjega kif minn 10,000 sptar, 500 biss għandhom din it-teknologija u l-isptar Mater Dei huwa wieħed minnhom.
