Il-Ministru għall-Wirt Nazzjonali, l-Arti u l-Gvern Lokali José Herrera, akkumpanjat miċ-Chairman tal-Aġenzija Kulturali għall-Belt Valletta Jason Micallef, żar is-sit tal-Biċċerija l-Qadima fil-Belt Valletta, hekk kif ix-xogħlijiet li għaddejjin bħalissa biex dan il-bini antik jinbidel fil-Valletta Design Cluster waslu fil-fażi finali. Il-Valletta Design Cluster, parti mill-Aġenzija Kulturali għall-Valletta u proġett ieħor ta’ legat tal-Kapitali Ewropea tal-Kultura Valletta 2018, se jkun qed jiftaħ il-bibien tiegħu fix-xhur li ġejjin.
Il-Ministru Herrera qal li, “ir-riġenerazzjoni tal-Biccerija l-Qadima għall-Valletta Design Cluster huwa proġett importanti mhux biss speċifikament għall-Belt Valletta u r-residenti tiegħu iżda wkoll għas-Setturi Kreattivi u Kulturali kollha”. Il-Gvern, permezz tal-Ministeru għall-Patrimonju Nazzjonali, l-Arti u l-Gvern Lokali, se jibqa’ mpenjat li jkompli jsaħħaħ dawn is-setturi permezz ta’ inizjattivi bħal dawn sabiex joħloq futur isbaħ għal eluf ta’artisti filwaqt li jkompli jixpruna it-talenti tal-artisti Maltin.
“Il-Valletta Design Cluster huwa wirt ieħor ta’ VALLETTA 2018, proġett infrastrutturali,li huwa l-ewwel wieħed tat-tip tiegħu fil-Belt Valletta proprju fil-qalba tal-komunità li jinkludi 3,000mtrs2 ta’ spazju għall-industrija kreattiva, artisti lokali u internazzjonali, NGOs u l-komunità tal-Belt Valletta”, tenna s-Sur Jason Micallef
Matul l-aħħar ftit xhur, ix-xogħlijiet u l-installazzjonijiet relatati mal-finituri tal-bini kienu għaddejjin b’pass mgħaġġel. Is-servizzi kollha inklużi l-konnessjonijiet tal-elettriku, tal-ilma u tad-dejta kif ukoll it-tagħmir għall-aċċessibilità, inkluż il-faċilitajiet tal-lift, issa ġew installati. Il-proġett issa se jimxi għall-fażi finali tiegħu, hekk kif fix-xhur li ġejjin se tkun qed isseħħ l-installazzjoni ta’ tagħmir u għamara fid-diversi spazji tal-bini, bi preparament għall-ftuħ tal-faċilitajiet lejn it-tieni nofs tas-sena. Fl-istess ħin, konnessjonijiet pubbliċi tal-ilma u tal-elettriku ġew mgħoddija fiż-żona tal-madwar bħala parti mir-restawr tat-toroq u l-ispazji pubbliċi ta’ biswit il-bini, filwaqt li x-xogħol fuq il-ksib tal-faċilitajiet tal-ġnien li se jkun hemm fuq il-bejt tal-bini bħalissa jinsab fl-aqwa tiegħu. Dawn l-interventi kollha huma ffinanzjati permezz ta’ Fondi Strutturali Ewropej u fondi tal-Gvern ta’ Malta.
Apparti x-xogħol fuq is-sit innifsu, l-Aġenzija Kulturali għall-Belt Valletta, permezz tal-Valletta Design Cluster, kompliet il-kollaborazzjonijiet lokali u internazzjonali tagħha permezz tal-parteċipazzjoni f’għadd ta’ netwerks u proġetti tal-UE, inkluż permezz tal-proġett DeuS iffinanzjat minn Erasmus+ u l-proġett Design4Innovation iffinanzjat mill-programm Interreg Europe. Dawn il-proġetti jipprovdu opportunitajiet għal prattikanti kulturali u kreattivi lokali biex ikollhom aċċess għan-netwerks u r-riżorsi Ewropej, kif ukoll jiftħu possibilitajiet għat-tixrid internazzjonali ta’ prattika tajba lokali minn prattikanti kulturali u kreattivi.
Il-Valletta Design Cluster, li jikkonsisti f’iktar minn 3,000 metru kwadru ta’ spazju intern li qed jiġi riabilitat, se jinkludi bosta żoni aċċessibbli għall-pubbliku li jistgħu jintużaw minn studenti, residenti, ħaddiema kulturali u prattikanti freelance fil-qasam tal-arti, id-disinn u l-intrapriża kreattiva kif ukoll mill-NGOs. Dawn l-oqsma jinkludu faċilitajiet ta’ ko-ħidma, spazju komplut b’għodda u tagħmir għall-fabbrikazzjoni diġitali, spazju tal-ikel komplut b’faċilitajiet għat-tagħlim u l-preparazzjoni tal-ikel, u numru ta’ studios għall-prattikanti kreattivi. L-ispazju ta’ fuq il-bejt qed jinbidel ukoll fi ġnien aċċessibbli għall-pubbliku, l-ewwel wieħed tat-tip tiegħu fil-Belt Valletta.
