Il-Ministru għall-Ġustizzja u Riforma tas-Settur tal-Kostruzzjoni, Dr Jonathan Attard, laqgħa grupp ta’ delegati li attendew għall-konferenza tal-Commonwealth Association of Law Reform Agencies (CALRAs) li qed issir f’Malta, fejn enfasizza l-impenn komuni għall-ġustizzja, l-ekwità, u s-saltna tad-dritt, li jgħaqqad il-parteċipanti minn ġurisdizzjonijiet diversi.
Fid-diskors tiegħu, il-ministru enfasizza l-importanza tal-kollaborazzjoni u d-djalogu fl-avvanz tar-riformi fil-liġi. Huwa rrifletta fuq il-wirt legali uniku ta’ Malta u esprima sodisfazzjon għall-isforzi kontinwi tal-pajjiż biex jimmodernizza l-qafas legali tiegħu. Huwa rrefera għal diversi inizjattivi ewlenin, inklużi riformi kostituzzjonali storiċi mmirati biex isaħħu l-istituzzjonijiet tas-saltna tad-dritt. Notevolment, il-proċedura riformata għall-ħatriet tal-ġudikatura u t-twaqqif ta’ Uffiċċju tal-Avukat tal-Istat distint mill-Uffiċċju tal-Avukat Ġenerali biex tissaħħaħ l-indipendenza fil-prosekuzzjoni.
Il-Ministru Jonathan Attard tkellem ukoll dwar is-sinifikat tal-pożizzjoni strateġika ta’ Malta fost diversi kulturi, li saħħew il-pajsaġġ legali tagħha u pprovdew perspettiva unika dwar l-isfidi kontemporanji. Huwa tkellem dwar ir-riformi leġiżlattivi reċenti, inkluża dik approvata din il-ġimgħa mill-Parlament dwar l-inkjesti maġisterjali li għandha l-għan li ttejjeb l-aċċess għall-ġustizzja u d-drittijiet tal-vittmi tal-kriminalità.
Huwa nnota li din il-liġi se tistabbilixxi skadenzi ċari, rwoli definiti, u drittijiet ġodda għall-vittmi, biex b’hekk issaħħaħ l-impenn tal-gvern favur il-ġustizzja. Issemmew ukoll inizjattivi oħrajn, bħal ħolqien ta’ Qorti Kummerċjali speċjalizzata u r-riforma fil-liġi ċivili tal-familja, li jenfasizzaw l-impenn tal-gvern għal ġustizzja effettiva u effiċjenti.
Barra minn hekk, il-ministru afferma mill-ġdid id-dedikazzjoni ta’ Malta biex trawwem soċjetà ġusta, li hija riflessa fl-impenn tagħha lejn id-drittijiet tal-bniedem, l-ugwaljanza bejn is-sessi, u l-ħarsien tal-minoranzi. Saħaq li dawn l-isforzi jistgħu jirnexxu biss permezz ta’ kollaborazzjoni u l-qsim tal-aħjar prattiċi mal-imsieħba tal-Commonwealth.
Hekk kif żvolġiet il-konferenza, il-ministru ħeġġeġ lill-parteċipanti biex jimpenjaw ruħhom b’mod miftuħ, jisfidaw is-suppożizzjonijiet, u jesploraw ideat trasformattivi li jistgħu jwasslu għal riformi legali sinifikanti.
Huwa temm billi awgura lid-delegati kollha diskussjoni siewja u konferenza ta’ ispirazzjoni, u ħeġġiġhom biex jisfruttaw il-kompetenza kollettiva tagħhom biex ifasslu triq lejn futur aktar ġust u ekwu għal kulħadd.
