Ir-rata ta’ riproduzzjoni tal-Coronavirus f’pajjiżna żdiedet ftit, għal 0.61. Ġimagħtejn ilu, kienet 0.54.
L-istatistiku u riċerkatur Vincent Marmarà spjega kif din iż-żieda hija waħda li matematikament tagħmel sens.
Huwa spjega: “Din ir-rata ta’ riproduzzjoni hija ta’ 0.61 li f’dal-aħħar ġimgħat ukoll kienet pjuttost waħda konsistenti kif wieħed jista’ jara f’din il-grafika. Hawnhekk għandna n-numru, r-rata ta” riproduzzjoni, dal-aħħar ġranet li hija waħda konsistenti, u allura dan qed jiġi kkalkulat fil-kuntest fejn għandna stabbiltá fil-każijiet b’hekk nifhmu aħjar il-firxa li hawn bħalissa.”
Huwa saħaq li din iż-żieda mhix marbuta mat-tnaqqis tal-miżuri li daħlu fis-seħħ mit-Tnejn li għadda.
Il-Professur Marmarà sostna: “Minħabba li kif diġà tkellimna persuna għandu on average incubation period ta’ madwar ħamest ijiem sakemm jibdew joħorġu s-sintomi tal-virus, sakemm joħroġ ir-rapport hemm bejn wieħed u ieħor jumejn oħra u allura għandek perjodu ta’ madwar sebat’ijiem sakemm minn mindu jidħlu l-miżuri l-ġodda sakemm jidħol l-ewwel każ biex hemmhekk nifhmu x’effett kellhom il-miżuri s’issa.”
Huwa spjega li jekk fil-ġimgħat li ġejjin ma tiżdiedx ir-rata ta’ riproduzzjoni, jistgħu jitnaqqsu r-restrizzjonijiet. Madankollu stqarr li sakemm ikun hemm il-każijiet fil-komunità, id-distanza trid tibqa’ tinżamm.
“Allavolja jitnaqqsu r-restrizzjonijiet diment li għad hemm il-każijiet fil-komunitá, wieħed dejjem importanti jibqa’ attent biex naċċertaw li ma jkollniex firxa li taqbeż il-wieħed. Diment il-firxa tkun inqas minn wieħed hemmhekk is-sitwazzjoni tkun aktar taħt kontroll”, kompla jgħid il-Professur Marmarà.
