Ir-rapporti ta’ frodi lill-Pulizija żdiedu b’għaxar darbiet f’għaxar snin, bejn l-2011 u l-2021.
Bħalissa, il-Pulizija qed tappella lill-pubbliku għall-attenzjoni minħabba e-mails qarrieqa li qed jintbagħtu f’isimha.
Fi stqarrija ntqal li dawn l-e-mails qed jintbagħtu f’isem il-Korp tal-Pulizija b’rabta ma’ investigazzjonijiet jew każijiet il-Qorti u jitolbu li jsir kuntatt fuq indirizz elettroniku falz.
L-appell tal-Pulizija huwa biex dawn il-messaġġi jiġu injorati u mħassra immedjatament.
F’intervista esklussiva ma’ ONE News, il-Kummissarju tal-Pulizija, Angelo Gafà, tkellem dwar l-investiment tal-Korp fejn jidħlu r-reati online, fid-dawl taż-żieda fil-kriminalità virtwali.
Qal, “Hemm ċertu reati li ftit li xejn tista’ tagħmel biex tipprevjenihom għajr li teduka aktar lill-pubbliku, li noħorġu iktar awareness campaigns, u dak nagħmluh kontinwament u jekk nitkellmu per eżempju fuq il-frodi, is-sena l-oħra kellna ’l fuq minn elfejn rapport, kważi 2,400. Jekk inqabblu l-ammont ta’ frodi li kellna għaxar snin qabel, fl-2011, kellna 270 każ, mela allura qed nitkellmu għaxar darbiet iktar u ħafna minn dawn il-frodi kienu online fraud.”
Il-Kummissarju tal-Pulizija spjega li l-pandemija m’għenet xejn biex jonqsu r-reati online, anzi żidithom għaliex in-nies qattgħu iżjed ħin fi djarhom, fuq il-midja soċjali u jixtru online.
Matul din is-sena, il-Korp waqqaf Taqsima speċjalizzata fuq reati online fi ħdan id-Dipartiment tar-Reati Kriminali Finanzjarji, li llum għandha uffiċjali ddedikati speċifikament biex jinvestigaw frodi online.
Fl-istess ħin, qed tissaħħaħ it-Taqsima tas-Cyber Crime.
Stqarr, “Tradizzjonalment, is-Cyber Crime Unit tal-Korp kien ikollna spettur jew tnejn, illum għandek erbgħa u l-impenn tagħna li nkomplu nżidu għaliex anki hemmhekk, l-istatistika turina li filwaqt li fl-2002 kellek żewġ każijiet ta’ computer crime, is-sena l-oħra kellna 340 rapport. Dis-sena l-indikazzjonijiet huma li ser ikomplu jiżdiedu u fil-verità llum ħafna mir-reati għandhom element ta’ computer enabled crime.”
Il-Kummissarju tal-Pulizija saħaq fuq l-importanza li l-Korp jibqa’ janalizza x-xejriet tal-kriminalità f’dinja li qed tinbidel minn waħda ta’ reati fiżiċi għal dawk virtwali.
Qal ukoll li pajjiżna jinsab fuq quddiem fejn tidħol il-blockchain analysis.
Qal li, “Il-Korp tal-Pulizija għandu blockchain analysis unit għaliex illum qed naraw ukoll ċertu reati kemm vittmi li jsofru konsegwenza ta’ cryptocurrency imma l-cryptocurrency tintuża bħala għodda biex jitwettqu r-reati kriminali allura anki hemmhekk, il-Korp tal-Pulizija qed ikompli jsaħħaħ unit tal-blockchain analysis li jkolli ngħid li hemm Pulizija fl-Ewropa li lanqas biss għandhom dan it-tip ta’ unit.”
