L-Oppożizzjoni Nazzjonalista kontinwament tikkritika lill-Gvern dwar għadd ta’ oqsma, mingħajr ebda bażi. Issa kien ir-rapport annwali maħruġ mill-Fond Monetarju Internazzjonali, l-IMF, fl-aħħar jiem li wera b’mod ċar li dak li jingħad mill-kelliema ta’ Bernard Grech u l-fergħa estremista hu biss mill-qerq fl-immaġinazzjoni fertili tagħhom.
Waqt li l-Partit Nazzjonalista spiss jirrikorri għar-retorika li l-Gvern mhux jinvesti biżżejjed fl-infrastruttura ta’ pajjiżna u li ż-żieda fil-popolazzjoni qed twassal għal għadd ta’ problemi u nuqqasijiet fil-provvista tal-enerġija, l-IMF jisħaq kompletament bil-kontra.
Fil-fatt l-esperti ta’ din l-istituzzjoni rinomata internazzjonali jisħqu li l-pajjiż mhux biss armat b’mod adegwat f’dan ir-rigward, iżda, anke jekk tiżdied ħafna d-domanda, il-Gvern għandu pjani biex ikabbar il-ġenerazzjoni tal-enerġija, permezz ta’ teknoloġiji rinnovabbli ġodda.
Ir-rapport tal-esperti internazzjonali tal-IMF iġib fix-xejn ukoll l-argument tal-Oppożizzjoni li l-qtugħ fid-dawl fis-sajf ta’ sentejn ilu, seħħ minħabba nuqqas ta’ kapaċità fis-sistema, meta fil-fatt il-problemi fid-distribuzzjoni ġew ikkawżati minn temperaturi għoljin.
Hawn l-IMF isemma li l-Gvern Malti ma baqax passiv u investa b’mod sostanzjali, tant li l-qtugħ fid-dawl is-sena l-oħra naqas ħafna.
Dwar il-produzzjoni tal-ilma, l-esperti tal-IMF kienu fiduċjużi li, minkejja li d-domanda qed tiżdied, il-kapaċità produttiva se tkun qed tiżdied ukoll u, fit-tliet snin li ġejjin, l-impjanti tar-reverse osmosis f’pajjiżna se jkunu qed jipproduċu aktar minn 30% iżjed milli meħtieġ.
Bernard Grech u l-esponenti fil-Partit tiegħu spiss iħobbu jipprovaw jagħtu l-impressjoni li, fejn tidħol is-sistema tad-drenaġġ, pajjiżna hu agħar minn pajjiżi Ewropej.
F’dan ir-rigward, l-IMF qal li l-Gvern Malti hu pro-attiv u qed jindirizza għadd ta’ sfidi u jieħu l-passi neċessarji, fosthom anke dak li qed jinħoloq minn materjal agrikolu.
Dwar ir-riċiklaġġ, ir-rapport jgħid li pajjiżna għamel progress kbir billi laħaq il-15 fil-mija fl-2022, fost l-ogħla rati Ewropej fejn il-medja hi biss ta’ 11.5 fil-mija.
Mir-rapport tal-Fond Monetarju Internazzjonali joħroġ ċar li l-inċentivi li joffri l-Gvern fejn jidħlu vetturi elettriċi huma ġenerużi ħafna meta mqabbla ma’ pajjiżi oħrajn fl-Unjoni Ewropea. Dwar dan, minflok, l-Oppożizzjoni Nazzjonalista tgħid li l-Gvern mhu qed jagħmel xejn f’dan ir-rigward dawn l-inizjattivi mhumiex biżżejjed.
Jissemma wkoll kif f’pajjiżna t-trasport pubbliku hu b’xejn u li, meta mqabbel ma’ gżejjer oħrajn, in-numru ta’ karozzi tal-linja hu ferm tajjeb. Bħala eżempju, fil-Gżejjer Baleariċi fi Spanja, l-ammont ta’ karozzi tal-linja, ras għal ras, hu nofs dak f’Malta, li wkoll tgawdi minn numru kbir ta’ toroq u infrastruttura, relatati mat-trasport.
Fl-aħħar, l-IMF ikompli jħeġġeġ lill-Gvern Malti biex juża l-istrateġija ‘Viżjoni Malta 2050’ biex jiffoka fit-tul ħalli jkompli jinħoloq aktar investiment f’pajjiżna għall-ġid tal-Maltin u l-Għawdxin kollha.
