L-Awtorità tal-Ippjanar ippubblikat linji gwida aktar ċari dwar kif wieħed jiddentifika, jinterpreta u jitratta l-kuntest ta’ bini skedat.
B’dan il-mod se tingħata aktar attenzjoni meta jsir l-assessjar u jiġu determinati proposti għall-iżvilupp li jinsabu viċin ta’ bini skedat jew monumenti.
F’Villa Frere, li riċentament ingħatat l-ogħla protezzjoni ta’ Grad wieħed, id-Direttur tad-Direttorat tal-Ippjanar fi ħdan l-Awtorità tal-Ippjanar Chris Borg spjega li dejjem għandu jsir assessjar dettaljat fuq l-impatt tal-iżvilupp propost fuq il-bini protett, u jiġu identifikati miżuri ta’ mitigazzjoni li jistgħu jittieħdu, b’rakkomondazzjonijiet mis-Sovrintendenza għall-Wirt Kulturali.
Malli l-kuntest jiġi stabbilit, l-applikant jintalab jipprovdi inventarju fotografiku dettaljat lid-Direttorat tal-Ippjanar.
“L-iskop tal-policy huwa biex filwaqt li nistabbilixxu x’inhu l-kuntest u l-bini skedat u r-relazzjoni bejniethom, nispjegaw ukoll l-kriterji li hemm bżonn jiġu adottati meta qed jiġu trattati applikazzjonijiet għal żvilupp fil-viċin ta’ dal-bini skedat, u anki biex nagħmlu ċar għall-periti x’hemm bżonn jiġi mitlub biex jista’ jsir assessment tajjeb ta’ dawn l-applikazzjonijiet fil-viċinanzi tal-bini skedat.”
Kull ma jkun propost biex isir, għandu jirrispetta l-kuntest tal-madwar b’tali mod li jitwaħħad mal-bini.
“B’hekk nistgħu naħdmu b’moħħna mistrieħ li mhux biss proteġejna l-binja imma anki l-madwar.”
Kull bini skedat għandu jittieħed fil-kuntest partikolari tiegħu, għalhekk l-ambjent tal-madwar huwa parti essenzjali tal-binja nnifisha.
“Il-kunċett li inti tipproteġi il-buffer zone, kif il-poplu jista’ jgawdi dak il-monument jew dik il-binja, hija waħda mill-iktar affarijiet importanti f’dak li huwa urban planning.”
Il-Ministru Aaron Farrugia qal li dan huwa pass fid-direzzjoni t-tajba biex dak li għadda għandna mingħand missirijietna, jiġi protett u jingħadda għand il-ġenerazzjonijiet futuri.
“L-iżvilupp intelliġenti jfisser ukoll li nipproteġu bini li huwa skedat kif ukoll monumenti. B’hekk flimkien mal-Planning Authority u l-Ministeru ħdimna fuq linji gwida ċari li jgħinu lill-case officers sal-Bordijiet kif ukoll il-Kummissjoni tal-Planning biex jgħinuhom jaħdmu meta jiġu biex jiddeċiedu dwar żvilupp li jkun hemm fil-madwar ta’ dawn is-siti partikolari u monumenti.”
