L-Erbgħa filgħaxija tnieda t-tieni volum tal-ktieb l-istorja tal-Partit Laburista, li fih jirrakkonta żewġ deċenji ta’ avvenimenti li għadda minnhom il-Partit Laburista mill-1940 sal-1960. Din it-tnedija saret bħala parti mill-attivitajiet li qed itella’ l-partit b’rabta mal-mitt anniversarju mit-twaqqif tiegħu. Attività li kienet indirizzata mill-Prim Ministru u Mexxej tal-Partit Laburista Robert Abela.
Frans Galea, l-awtur tal-ktieb, qal illi l-programmi elettorali tal-Partit kienu punt ta’ referenza fir-riċerka li għamel.
Huwa spjega: “Il-Programmi elettorali tal-Partit Laburista u minnhom ġibt l-insipirazzjoni naturalment ta’ dak li dejjem ried iwettaq il-Partit Laburista.”
L-awtur kompla jispjega illi fir-rakkont meta l-Partit immexxi mill-Perit Mintoff kien tela’ fil-Gvern ħadem sabiex iġib lejn Malta investimenti barranin.
Is-Sur Galea sostna: “Fl-1955 reġa’ kien fil-gvern, kellu programm elettorali b’saħħtu ħafna u rnexxielu jleħħaq ħafna minnu, apparti li ġab miljun kbar mill-Ingilterra li qabel ma kinux jiġu, u bih seta’ mhux biss itejjeb il-qagħda tal-poplu Malti, iżda wkoll iġib il-pagi tan-nies li kienu jaħdmu fis-servizzi biex ikun hemm dħul akbar fil-pajjiż.”
Intant, waqt id-diskors tieghu, Il-Prim Ministru u Mexxej tal-Partit Laburista Robert Abela elenka l-kisbiet li għamel il-Partit Laburista matul is-snin u kif sal-lum għadna ngawdu minn dak li kiseb dan il-partit.
Fakkar ukoll kif matul is-snin Gvernijiet Laburisti ħarġu lill-poplu mill-faqar, filwaqt li ta’ ħarsa kif il-Partit ta’ d-dinjità lill-ħaddiema u semma wkoll id-diversi drittijiet ċivili li matul is-snin ingħataw fosthom id-dritt tal-vot lin-nisa kif ukoll iż-żwieġ ugwali, dritt li ingħata fl-aħħar snin.
Dr. Abela qal li huwa kburi li jmexxi ta’ dan il-moviment u filwaqt li sellem lil mexxejja kollha li mexxew lill-partit qablu il-mexxej Laburista semma kif għal kuntrarju tal-Partit Nazzjonalista, l-għaqda tikkaraterizzana bħala partit.
