Malta hija l-unika pajjiż fil-Mediterran li toffri s-servizz ta’ manutenzjoni tal-jottijiet permezz ta’ yacht lift effiċjenti u ħabib tal-ambjent.
Dan grazzi għal investiment ta’ €3 miljun mill-kumpanija privata Yacht Lift Malta Ltd u li ġie inawgurat il-Ħamis wara nofsinhar f’Ta Xbiex.
Waqt konferenza tal-aħbarijiet li rat l-inawgurazzjoni ta’ dan il-yacht lift ġdid fil-preżenza tal-Ministru għat-Trasport Ian Borg, ingħatat dimostrazzjoni tal-effiċjenzi li joffri dan il-lift.
Fil-fatt stajna nsegwu kif fi ftit inqas minn għaxar minuti jott imdaqqas sew ġie mgħolli ’l fuq mil-livell tal-ilma sabiex ikun jista’ jsirlu manutenzjoni fuq il-post mill-istess kumpanija mingħajr ma jieħu spazju fuq l-art.
Dan filwaqt ukoll li jiffranka l-flus lis-sidien tad-dgħajjes u jeħles ukoll il-ħinijiet ta’ stennija sakemm isir il-manutenzjoni.
Il-Kap Eżekuttiv ta’ Yacht Lift Malta Limited Daniel Gatt elenka l-karatteristiċi ta’ dan il-yacht lift uniku fil-Mediterran u li se jkun qed jattira ħafna sidien ta’ jottijiet mhux biss Maltin iżda anke barranin.
Huwa qal, “Yachts up to 50 tonnes which is around 70 feet of all types can be lifted, so catamarans, sailing boats, motor boats, out of the water in 5 to 10 minutes depending on their displacements. We offer all services in house so anti-fouling, engeneering services, polishing, all works required of the yacht prior to the summer.”
Intant il-Ministru Ian Borg fisser kif dan l-investiment privat jikkumplimenta t-tkabbir li ra pajjiżna fil-qasam marittimu fosthom fin-numru ta’ superyachts irreġistrati taħt il-bandiera Maltija.
Huwa stqarr: “Dak li huwa nadif jerġa’ jinżel fil-baħar, dak li le ma jerġax jispiċċa fil-baħar u allura jispiċċa l-ħtiġijiet ambjentali tal-madwar. Naħseb li huwa investiment li ser ikompli jtejjeb l-faċiltajiet tal-pajjiż.”
