B’investiment ta’ €15-il miljun, ġew introdotti żewġ proġetti ġodda li se jgħinu fil-ġbir u l-ipproċessar ta’ informazzjoni relatata mas-sajd u l-akkwakultura.
F’konferenza tal-aħbarijiet li saret Marsaxlokk, saret l-ewwel sejħa għall-proġetti marbuta mas-settur tas-sajd, mid-Dipartiment tas-Sajd u l-Akkwakultura, bil-għan li ssaħħaħ id-diġitizzazzjoni, ir-riċerka u l-innovazzjoni.
Permezz ta’ dawn il-fondi Ewropej, mill-fond Ewropew Marittimu għas-Sajd u l-Akkwakultura, issa se jkun hemm lok għal diversi proġetti, fosthom kampanji pubbliċi, riċerka u innovazzjoni, xiri ta’ apparat, kif ukoll servizzi u taħriġ.
Il-konferenza tal-aħbariiet ġiet indirizzara mis-Segretarju Parlamentari Segretarju għall-Akwakultura u d-Drittijiet tal-Annimali, Alicia Bugeja Said, u mis-Segretarju Parlamentari għall-Fondi Ewropej, Chris Bonett.
Huma qalu li l-ewwel prijorità se tkun li tissalvagwarda s-sajd u l-ispeċijiet marittimi permezz ta’ prattiki aktar sostenibbli.
L-ewwel proġetti li se jiġu implimentati huma sistema integrata tal-informazzjoni tas-sajd, u l-ġbir, il-ġestjoni, l-użu u l-ipproċessar ta’ dejta fis-settur tas-sajd.
Din is-sistema integrata ta’ informazzjoni se tara l-kompilazzjoni ta’ dejta f’ħin reali, fejn is-sistemi eżistenti se jiġu integrati f’sistema ċentralizzata, għal aktar trasparenza, mill-qabda sal konsum.
It-tieni proġett, bl-isem ta’ DC-MAP, hu iffokat fuq trawwim tas-sajd bil-għan li tkkonserva riżorsi akkwatiċi permezz ta’ data affidabbli.
Is-sezzjoni tar-Riċerka tas-Sajd fi ħdan id-Dipartiment tas-Sajd u l-Akkwakultura se tiżgura li jiġu ssodisfati l-obbligi ta’ Malta għall-ġbir ta’ dejta xjentifika.
Dan se jwassal ukoll għal aktar infurzar, filwaqt li jassigura li s-settur ikun ekonomikament vijabbli u reżiljenti, tant li jikkompeti ma’ pajjiżi terzi.
Dawn iż-żewġ proġetti kofinanzjati mill-Fond Ewropew għall-Affarijiet Marittimi, is-Sajd u l-Akkwakultura, isaħħu l-impenn lejn is-sajd sostenibbli.
Is-Segretarju Parlamentari Alicia Bugeja Said tkellmet dwar kif, permezz ta’ skemi ta’ din ix-xorta, pajjiżna se jkun qed jibbenefika.
Qalet, “Qegħdin inħarsu lejn pjattaforma diġitali, biex innaqqsu d-dewmien meta sajjied japplika jew jagħmel xi transfer għal xi dgħajsa, imma min-naħa l-oħra qed inħarsu lejn ir-riċerka bħala l-fulkru ta’ kollox. Importanti li nkomplu nistudjaw il-ħut tagħna għax fl-aħħar mill-aħħar meta tagħmel l-istock assessment, li tanalizza l-ħut, tkun tista’ tagħmel il-forecast għall-futur.”
Hija semmiet ukoll kif, grazzi għal impenn ta’ din ix-xorta, żdiedet il-kwota tat-tonn b’erbgħa u erbgħin tunnellata.
Min-naħa tiegħu, is-Segretarju Parlamentari għall-Fondi Ewropej, Chris Bonett, elenka din l-għotja mal-pakkett ta’ Fondi Ewropej li ġie nnegozjat mill-Prim Ministru Robert Abela, f’Jannar li għadda, li jammonta għal tnejn punt tnejn biljun ewro.
Qal, “Ma stennejniex sal-aħħar tas-sena. Kif wegħidna f’Jannar, tlaqna mill-ewwel niġru bil-pakkett ta’ Fondi Ewropej ġodda li kien innegozja l-Prim Ministru lura f’Jannar. Qegħdin hawnhekk proprju biex inħabbru dan il-fond importanti, il-fond tas-sajd u l-akkwakultura, bi €33 miljun. Se nkunu qed naraw kif se nkabbru s-sostenibblità tas-sajd tagħna, il-protezzjoni tal-ħut tagħna fl-ibħra tagħna u se naraw kif dan il-mutur daqstant importanti se jkompli jżid mal-ekonomija li sejra tajjeb ħafna f’pajjiżna.”
Dawn il-proġetti iridu jiġu implimentati sa mhux aktar tard mill-elfejn u tletin.
Intant dawk kollha li jixtiequ jiksbu aktar informazzjoni, jistgħu jagħmlu dan permezz tan-numru 22926800 jew fuq l-indirizz elettroniku fisheriesprojects.mafa@gov.mt
