B’investiment ta’ nofs miljun ewro, il-Malta Drone Centre ser jibda jħarreġ operaturi ta’ drones sabiex ikompli jinċentiva aktar dan is-settur emerġenti biljunarju.
Dan tħabbar f’konferenza tal-Gvern bis-sehem tal-Malta Enterprise u Transport Malta fejn fiha ġie spjegat kif b’dan il-mod pajjiżna qed jaħseb għall-futur sabiex jikkapitalizza minn fuq l-industrija tal-avjazzjoni li bħalissa minħabba l-pandemija tinsab għarkupptejha.
Permezz ta’ dan l-investiment il-Malta Drone Centre issa ser ikun jista’ jimpjega 10 tekniċi u inġiniera sabiex jgħinu fit-taħriġ.
Dwar dan, ONE News tkellem mal-Kaptan Charles Pace minn Transport Malta hekk kif spjega l-importanza tat-taħriġ f’dan il-qasam tad-drones u li jifforma parti mill-industrija tal-avjazzjoni.
Pace stqarr: “Importanti ħafna. Dan qed ittir fl-ispazju tal-ajru, drone jista’ jaħrab, jista’ jersaq lejn l-ajruport, jista’ jersaq lejn nies, jista’ jersaq lejn postijiet li huma essenzjali għall-Malta. L-avjazzjoni hija regolata ħafna u kull aspett huwa regolat.”
Intant waqt il-konferenza, il-Malta Enterprise ffirmat ftehim mad-diretturi tal-grawnd tal-Hibs sabiex dan jibda jintuża għat-taħriġ mill-Malta Drone Centre.
Il-Ministru għall-Enerġija, l-Intrapriża u l-Iżvilupp Sostenibbli, Miriam Dalli, li hija responsabbli mill-Malta Enterprise qalet li permezz ta’ dan il-ftehim, kumpaniji futuri jistgħu jimirħu f’din in-niċċa f’pajjiżna madankollu dan huwa biss l-ewwel pass.
Il-Ministru Dalli sostniet: “Aħna m’aħniex ser nieqfu hawnekk jiġifieri t-triq ‘il quddiem hija li nkomplu nimirħu aktar f’din l-industrija u industriji oħra. Irridu industriji li għandhom valur miżjud, irridu industriji li joħolqu aktar impjiegi f’pajjiżna. Dik hija l-filosofija tagħna, dik hija l-politika li qed naħdmu fuqha u li se nkomplu naħdmu fuqha fix-xhur u s-snin li ġejjin.”
B’rabta ma’ dan l-investiment, Transport Malta ċċertifikat il-grawnd tal-Hibs skont ir-regoli tal-Aġenzija tal-Unjoni Ewropea għas-Sigurtà tal-Avjazzjoni, l-EASA, filwaqt li ħarġet il-liċenzja lill-Malta Drone Centre biex ikun jista’ jopera bħala akkademja.
Il-Ministru għat-Trasport, Ian Borg tenna s-sodisfazzjon tiegħu anke għas-sinġerija bejn l-entitajiet tal-Gvern li jagħmlu aktar faċli sabiex jattiraw investimenti ta’ dan it-tip f’pajjiżna.
Il-Ministru Borg saħaq: “Is-sabiħ huwa li r-regolatur f’dan il-każ Transport Malta imma anke l-Malta Enterprise, li tassisti l-kumpanija jaħdmu flimkien għaliex importanti li nirregolaw, importanti li jkun hemm bilanċ bejn l-importanza tal-industrija imma r-rispett lejn iċ-ċittadin fl-istess ħin qed naraw niċċa li tista’ toħloq impjiegi ta’ kwalità u industrija li tista’ tikber b’mod sostanzjali.”
