Permezz ta’ investiment totali ta’ seba’ mitt elf ewro, San Pawl il-Baħar se jara ħames proġetti infrastrutturali bil-għan aħħari li jsaħħu l-potenzjal ta’ din il-lokalità turistika.
F’konferenza tal-aħbarjiet virtwali bit-tema Gvern għan-nies, ġie mħabbar li dawn il-proġetti jinkludu xogħlijiet b’investiment ta’ tliet mitt elf ewro fuq il-Belvedere fi Triq San Franġisk.
Hawnhekk se jinbidel wiċċ ix-xatt li jkompli fi Triq San Ġilardu u jwassal sal-Kappella tal-Ħġejjeġ.
It-tieni proġett se jsir fiż-żona ta’ bejn Triq San Publiju u Triq San Franġisk, b’investiment li jlaħħaq il-ħamsin elf ewro.
Dan il-proġett jinkludi masġar ġdid li se jħaddar din iż-żona.
It-tielet proġett, b’investiment ta’ mija u tletin elf ewro se jtejjeb u jsebbaħ pajsaġġ abbandunat fiż-żona ta’ bejn Triq il-Knisja u Triq San Ġilardu.
Proġett ieħor se jsir b’investiment ta’ mija u għoxrin elf ewro li se jindirizza n-nuqqas ta’ aċċessibbiltà f’din iż-żona permezz ta’ pajsaġġ ġdid.
Dan il-proġett se jtejjeb l-esperjenza turistika li joffru s-salini f’din iż-żona.
Fl-inħawi ta’ Triq il-Luzzu mbagħad se jsiru turġien li se jtejbu l-faċilitajiet ta’ din iż-żona magħrufa għall-ispazju ta’ rilassament fis-sajf.
Dan l-aħħar proġett se jsir b’investiment ta’ mitt elf ewro.
Is-Sindku ta’ San Pawl il-Baħar, Alfred Grima laqa’ dan l-investiment.
Huwa qal, “Kull investiment li isir fil-lokalità tagħna huwa apprezzat ferm kemm mir-residenti u ovvjament jixpruna iktar ħidma favur il-lokalità mill-Kunsil lokali.”
Min-naħa tiegħu ċ-Chairman tal-Awtorità Maltija għat-Turiżmu Gavin Gulia saħaq kif fi sfond ta’ pandemija għaddejjin b’ħidma kontinwa sabiex meta l-eluf ta’ turisti jerġgħu jibdew jiġu lejn pajjiżna, jsibu Malta isbaħ u aħjar.
Fuq dan saħaq ukoll il-Ministru għat-Turiżmu Clayton Bartolo.
Huwa sostna: “Ħames proġetti b’investiment li jlaħħaq seba’ mitt elf ewro sabiex b’hekk naraw li nkomplu ntejbu l-ħajja tar-residenti u fl-istess waqt ngħollu ukoll il-livell tal-prodott turistiku ta’ din iż-żona hekk partikolari għal din iż-żona.”
